Ուկրաինայի Տերնոպոլի, Լվովի և Իվանո-Ֆրանկովսկի շրջաններում անժամկետ գործադուլ է հայտարարվել, հաղորդում է gazeta.ru-ն՝ հղում անելով «Ուկրաինսկայա պրավդա»-ին:
Գործադուլի մասին որոշմանն արտահերթ նիստում աջակցել է Տերնոպոլի քաղաքային խորհուրդը. աշխատանքը դադարեցնելու խնդրանքով շրջանի բնակիչներին է դիմել քաղաքային խորհրդի ղեկավար Սերգեյ Նադալը:
Լվովի շրջանային խորհրդի ղեկավար Պյոտր Կոլոդին նույնպես կոչ է արել բնակիչներին գործադուլի անցնել:
Իվանո-Ֆրանկովսկի ղեկավար Վիկտոր Անուշկևիչուսն աջակցել է գործադուլը. նա և իր տեղակալները երկուշաբթի օրվանից մեկնել են արձակուրդ՝ առանց աշխատավարձը պահպանելու:
Այդ շրջանների իշխանությունները կոչ են անում բնակիչներին իրենց ձեռնարկություններում գործադուլի հանձնաժողովներ ստեղծել:
Միևնույն ժամանակ Կիևի քաղաքային վարչակազմի կայքում հաղորդվում է, որ իրենց ստորաբաժանումները, որոնք գտնվում են ակտիվիստների կողմից գրավված շենքից դուրս, աշխատում են նորմալ ռեժիմով: