Քաղաքացիական ակտիվիստ Զարուհի Հովհաննիսյանն այսօր կայացած ասուլիսին մեկնաբանելով երեկ Երևանում տեղի ունեցած բողոքի ակցիան՝ կարծիք հայտնեց, թե այն Հայաստանի ինքնիշխանությունն ընդգծելու համար էր, որը խոչընդոտվեց ոստիկանների կողմից:
Նա պատմեց. «Առավոտյան առաջինը մենք ենք բերման ենթարկվել ոստիկանություն, ինչն ապօրինի էր: Ոստիկանությունում մոտ երկու ժամ ոչ մի գործընթաց չէր կատարվում: Ինչ վերաբերում է փաստաթղթային հիմքերին, նրանք մեզ ներկայացրին, թե չենք ենթարկվել Ոստիկանության օրինական պահանջին: Սակայն մեզ որևէ պահանջ չէր ներկայացվել: Մեզ անընդհատ շեշտում էին, որ հրավիրում են Ոստիկանություն, սակայն չկա այդպիսի բան»:
Ակտիվիստը նաև ասաց, որ երբ ինքը փորձել է պարզել Երևանի ոստիկանապետ Աշոտ Կարապետյանից, թե ինչու՞ են քաղաքացիներին բերման ենթարկում, վերջինս նրան պատասխանել է, թե «դու այստեղից ցվրվեիր, լավ կանեիր»:
Նրա վստահեցմամբ՝ երեկվա ակցիայի ժամանակ որևէ քաղաքացի չի խախտել հասարակական կարգ, որևէ մեկը զինված չի եղել, անկարգություններ թույլ չի տվել:
Ասուլիսին ներկա լրագրող Վարդան Մինասյանը, ով նույնպես երեկ բերման էր ենթարկվել, պատմեց, որ փորձել է ֆիքսել այն պահը, երբ Լևոն Բարսեղյանին էին բերման ենթարկում, դրանից էլ ամեն ինչ սկսվել է. «Կողքս կանգնած էր Երևանի ոստիկանապետը, ով խլեց ձեռքիցս ֆոտոխցիկը: Դրանից հետո երկու հոգի բռնի ուժով գցեցին մեքենան ինձ և տարան: Երբ մեքենայի միջից փորձեցի զանգել խմբագրություն և տեղեկացնել կատարվածի մասին, ոստիկաններից մեկը հարվածեց ծնոտիս: Հենց մեքենայի մեջ ծեծեցին կողքիս երկու հոգուն»:
Լրագրողի փոխանցմամբ՝ Աշոտ Կարապետյանից սկսած ինքն ասել է, որ լրագրող է: «Էդ անչափահաս էրեխեքին թողած՝ սկսեցին ինձնով զբաղվել և այդ շարքից առաջինն ինձ ազատ արձակեցին: Մեքենայում ահավոր էր վերաբերմունքը, ձեռնաշղթաներ էին հագցրել: Իմ խցիկն այդպես էլ չվերադարձրին»,-ասաց նա:
Քննարկմանը ներկա էր նաև Ոստիկանության իրավաբանական վարչության պետ Մերուժան Հակոբյանը, ով ասաց, թե երեկ որևէ ինքնանպատակ բան չի եղել, մարդկանց բերման ենթարկելու քանակի, պատվերի խնդիր գոյություն չուներ: Իսկ լրագրողի հետ կատարվածի մասին ասաց, որ իրենք միայն լրագրողական «բեյջով» են տարբերում լրագրողներին, բայց երբ հանցագործություն է կատարվել, ու մի քանի հոգի վազում են, ոստիկանը ետևից չի կարող տարբերել, թե լրագրո՞ղ է տվյալ քաղաքացին, թե ոչ:
«Լրագրողներին տարբերակելու համար քայլեր կձեռնարկվեն, կմտածենք տարբերակներ, որպեսզի նման դեպքերում առանձնացնենք լրագրողներին»,-ասաց նա:
