Մեր սխալներից մեկը նաև այն էր, որ մենք երբեմն կեղծում էինք մեզ, ասում էինք բաներ, որոնց հետ հոգու խորքում համաձայն չէինք: Լրագրողների հետ զրույցի ժամանակ հայտարարեց ԱԺ ՀՀԿ խմբակցության պատգամավոր Արմեն Աշոտյանը՝ խորհուրդ տալով նոր իշխանություններին չկրկնել իրենց սխալը. «Նրանք շատ արագ սովորեցին մեր սխալները»:
Աշոտյանը խոստովանեց, որ սխալներ են արել՝ հորդորելով ՀՀ իշխանություններին չկրկնել նույն սխալները, որոնց պատճառով Հանրապետական կուսակցությունն այսօր այս ճգնաժամի մեջ է երկրի հետ միասին. «Մի արեք դա»:
Ինչ վերաբերում է ՀՀԿ-ն լքողներին, Աշոտյանը նախ ասաց, որ նրանց մեծ մասն այն մարդիկ են, ովքեր ռեյտինգայինով են ընտրվել, դրա համար պետք չէ պնդել, թե ռեյտինգայինը Հանրապետականի համար լավ է: Ապա նա նշեց, որ մարդկանց լքելն իր համար նախ մարդկային ցավ է, որովհետև շատերի հետ ընկերություն է արել, երկար ճանապարհ անցել:
Աշոտյանի խոսքերով, ՀՀ իշխանությունները բոլոր հնարավորություններն ունեն Հայաստանի գլխին Դամոկլյա սրի նման կախված ԸՕ-ն անցկացնել խորհրդարանում, որովհետև Հանրապետականն այլևս մեծամասնություն չէ: