Ռուսաստանը երբեք առաջինը չի կիրառի իր միջուկային ներուժը: Նման հայտարարությամբ հանդես է եկել ՌԴ Նախագահի մամուլի խոսնակ Դմիտրի Պեսկովը՝ մեկնաբանելով «Валдай»-ում Վլադիմիր Պուտինի խոսքերը:
Պեսկովի խոսքերով, Պուտինի ելույթի գլխավոր ասելիքն այն է, որ Ռուսաստանում դոկտրինայի մակարդակով արձանագրված է, որ Մոսկվան առաջինը չի կիրառելու իր միջուկային զենքը, այն կիրառվելու է միայն երբ Ռուսաստան պետության գոյությանը վտանգ սպառնա:
«Մենք երբեք առաջինը չենք հարձակվելու որևէ մեկի վրա: Սակայն եթե մեզ վրա հարձակվեն, հարձակվող կողմից ոմանք կհայտնվեն դրախտում, ոմանք՝ դժոխքում: Ահա թե ինչը պետք է հասկանալ, իսկ մնացած ամեն ինչն ալեգորիա է »,-ասել է Պեսկովը:
Հոկտեմբերի 18-ին Պուտինը հայտարարել էր, որ Ռուսաստանի վրա հարձակվող ագրեսորը պետք է իմանա, որ ոչնչացվելու է. «Մենք ագրեսիայի զոհ կլինենք, կլինենք նահատակներ և կհայտնվենք դրախտում: Իսկ ահա նրանք ուղղակի կսատկեն, որովհետև նույնիսկ չեն հասցնի զղջալ»:
