Ռուս սահմանապահները ձերբակալել են հայ-թուրքական սահմանն ապօրինի հատած անձի: Այս մասին հայտնում է «Արմենպրես»-ը` հղում անելով Հայաստանում ՌԴ Դաշնային անվտանգության ծառայության սահմանապահ վարչության մամուլի ծառայությանը:
Արտաշատի սահմանապահ ջոկատի սահմանապահները ձերբակալել են Հայաստանի Հանրապետության պետական սահմանն ապօրինի հատած անձի, ում մոտ փաստաթղթեր չեն հայտնաբերվել: Նախնական տվյալներով սահմանախախտն Աֆղանստանի Իսլամական Հանրապետության քաղաքացի է:
Նշվում է, որ սահմանախախտը կյանքի լավագույն պայմանների փնտրտուքներով առանց խոչընդոտների հատել է պակիստանա-աֆղանական, աֆղանա-իրանական, իրանա-թուրքական սահմանները և միայն Հայաստան մտնելու փորձի ժամանակ ձերբակալվել է ռուս սահմանապահների կողմից:
Սահմանախախտը փոխանցվել է համապատասխան մարմիններին՝ միջադեպի հանգամանքները պարզելու համար:
