«Շառլ Ազնավուրն ինձ համար եղել է և կմնա համաշխարհային մեծության երգիչ: Ազնավուրի երգերով սերունդներ են դաստիարակվել: Նրա գլխավոր ուղերձներից մեկը, որ մարդկության ապագան երիտասարդներն են՝ միշտ կմնա մեզ հետ»,-«Գառնի» պատմամշակութային արգելոց-թանգարանում երեկ ասել է ֆրանսիացի երգիչ, բարիտոն, ֆրանսիական ազգային գվարդիայի երգչախմբի անդամ Ժերեմի Դելվերը:
Ժ.Դելվերը հայ հանդիսատեսին հայտնի է դարձել Շառլ Ազնավուրի հոնգեհանգստի արարողության ժամանակ «Հայկական վալս» ստեղծագործությունը կատարելուց հետո: Նա Հայաստանի իշխանությունների կողմից պաշտոնական հրավեր է ստացել՝ հոկտեմբերի 29-ին և 30-ին Երեւանում կայանալիք «Քեզ համար, Ազնավուր» խորագրով համերգին մասնակցելու համար: Ժ.Դելվերը «Հայկական վալսը» կկատարի մեծ շանսոնիեի հիշատակին նվիրված միջոցառմանը:
Ֆրանսիացի երգիչը հուզված ու շնորհակալ է հրավերի համար: Նրա ձայնը համապատասխանել է երգին, այդ պատճառով էլ Դելվերի ղեկավարը հենց նրան է ընտրել: Ֆրանսիացի բարիտոնի խոսքով իրեն օգնել են պարոն Արմեն Շմավոնյանը եւ տիկին Հիլդա Գեղամյանը:
«Հուսով եմ, որ կարողացել եմ փոխանցել այդ գեղեցիկ պոեզիայի իմաստը: Մինչ Ազնավուրի մահը Հայաստանի ու հայերի մասին ես ոչինչ չգիտեի, հիմա այլ է»,-ասել է Ժ.Դելվերը՝ հավելելով, որ նաև շատ հայ ընկերներ ունի:
«Ես հավատում եմ, որ մի վայրկյանում կարող է փոխվել մարդու ճակատագիրը, համոզված եմ, որ Ժ.Դելվերի ճակատագիրը ևս փոխվել է: Նա դարձել է աշխարհասփյուռ հայության սիրելին»,-իր խոսքում ասել է «Պահպանության ծառայություն» ՊՈԱԿ-ի տնօրեն Արա Թարվերդյանը:
Ֆրանսիացի երգիչը երեկ «Գառնի» պատմամշակութային արգելոց-թանգարանում էր: «Պահպանության ծառայություն» ՊՈԱԿ-ի տնօրեն Արա Թարվերդյանի ուղեկցությամբ նա շրջել է արգելոցի տարածքում՝ ծանոթացել հայկական ճարտարապետության գոհարներից մեկի պատմությանը, ունկնդրել՝ տաճարի ներսում հնչող հայկական դուդուկի հնչյունները: Հայկական երաժշտությունը Ժ.Դելվերին հիշեցրել է Շառլ Ազնավուրին տված վերջին հրաժեշտը:
Ֆրանսիական ազգային գվարդիայի երգչախմբի անդամը կարճ ժամանակով է Հայաստանում: Նա տպավորվել է «Գառնի» տաճարի շքեղությամբ, բայց նաև խոստովանել է, որ չի հասցնի ծանոթանալ հայկական մշակույթի ամբողջ գեղեցկությանը: Առաջիկա օրերին Դելվերը կմեկնի՝ արձակուրդներին կրկին վերադառնալու ակնկալիքով:
