Լրագրողների հետ հանդիպմանը, խոսելով Թուրքիայի վարչապետ Ահմեդ Դավութօղլուի Հայաստան կատարած այցի մասին, ԱԺ «Հայ ազգային կոնգրես» խմբակցության անդամ Լյուդմիլա Սարգսյանը ասաց, որ մենք չպետք է այդչափ կարևորեինք Դավութօղլուի այցը, պետք էր նրան շողքի տակ թողնել: Նա ոչ մի նորություն չէր ասելու: Այդ այցը պետք էր դիտել Սևծովյան տնտեսական համաժողովի շրջանակներում: :
Նրա համոզմամբ, Թուրքիան փորձում է ամեն ինչ անել, որ տարածաշրջանում ազդեցություն ունենա, հատկապես՝ արցախյան հակամարտության կարգավորման հարցում: «Պատահական չէ, որ շահարկվում է Արցախի երկու շրջանները Ադրբեջանին հանձնելու մասին խոսակցությունը: Թուրքիան ակնարկում է, որ միայն այդ դեպքում կբացի հայ-թուրքական սահմանը»,- ասաց Լյուդմիլա Սարգսյանը՝ հավելելով, թե մենք պետք է կարողանանք հասնել նրան, որ Թուրքիան տարածաշրջանում չեզոքություն պահպանի և պայմաններ չթելադրի սահմաններ բացելու հարցում:
Անդրադառնալով Հայաստանի՝ Մաքսային միությանն անդամակցելու հարցին, Լյուդմիլա Սարգսյանն ասաց, թե ինքն այն համոզմանն է, որ Հայաստանի անվտանգության երաշխավորը Ռուսաստանն է, ու իր համար ընդունելի է Մաքսային միությանն անդամակցելը. «Սակայն ոչ այս պայմաններով: Մաքսային միությանն անդամակցելու պարագայում մենք պետք է թելադրենք մեր խաղի կանոնները, այլ ոչ թե ենթարկվենք այլոց կանոններին»:
