Եվրոպական միությունն անհանգստացած է Թուրքիայում ոստիկաններին աշխատանքից հեռացնելու փաստով և պահանջում է հետաքննել կոռուպցիոն խախտումների վերաբերյալ բոլոր դիմումները, այդ թվում՝ իշխանությունների կողմից։ Այս մասին նշել է Եվրոպական հանձնաժողովի պաշտոնական ներկայացուցիչ Օլիվյա Բային, գրում է РИА Новости-ն։
«Մեծ թվով ոստիկանների աշխատանքից հեռացնելը, որի կուլմինացիան դարձավ Անկարայում 350 ոստիկանի աշխատանքից ազատումը, մեզ անհանգստացնում է։ Մենք պահանջում ենք Թուրքիայից, որպես թեկնածու երկիր, ԵՄ-ին անդամակցելու պահանջների կատարման վերաբերյալ պարտավորություն ստանձնել, ներառյալ՝ իրավական պետության սկզբունքներին հետևելը, և անել ամեն ինչ, որպեսզի բոլոր դիմումները, այդ թվում՝ որոշ ղեկավարների թույլ տված խախտումների վերաբերյալ, հետաքննվեն առանց խտրականության և անկողմնակալ կերպով»,- ասել է Բային։
Վերջին օրերի ընթացքում Թուրքիայի իշխանություններն Անկարայում կոռուպցիոն խոշոր սկանդալի պատճառով աշխատանքից հեռացրել են հարյուրավոր ոստիկանների։
