Ավարտվեց Աստանայում ընթացող ՀԱՊԿ նիստը, որի ժամանակ ՀԱԿՊ գլխավոր քարտուղար նշանակելու մասով որոշում չի ընդունվել, այն կայացվելու է դեկտեմբերի 6-ին: Նիստից հետո Ղազախստանի նախագահ Նորսուլթան Նազարբաևը հայտարարել է, որ հաջորդ գլխավոր քարտուղարը լինելու է Բելոռուսի ներկայացուցիչը. «Մեր կանոնադրությամբ Հայաստանից հետո այբբենական կարգով հաջորդը Բելոռուսն է: Իհարկե, Հայաստանն ուզում է երկարաձգել ժամկետը: Բոլոր երկրների ղեկավարներն ասել են, որ մնում է մի տարի, նա չի հասցնի նույնիսկ այդ երկրներ այցելել, նրանք նշեցին, որ դրա համար մեզ պետք է , որ հաջորդը լինի նորմալ գործող գլխավոր քարտուղար՝ բելոռուսական կողմից»,- ասել է նա:
ՌԴ նախագահ Վլադիմիր Պուտինի մամուլի խոսնակ Դմիտրի Պեսկովն էլ լրագրողների հետ զրույցում ասել է, որ ՀԱՊԿ գլխավոր քարտուղարի մասով որոշում կկայացվի դեկտեմբերի 6-ին:
Պեսկովը նաև նշել է, որ նիստի ժամանակ ՌԴ նախագահ Վլադիմիր Պուտինը տեղեկացրել է կառույցի անդամներին ամերիկյան կողմի հետ միջին և փոքր հեռավորության հրթիռների շուրջ պայմանագրի մասով հնարավոր բանակցությունների մասին:
«Պուտինը մանրամասն տեղեկացրել է գագաթնաժողովի մասնակիցներին ռազմավարական կայունության և ռազմամթերքի վերահսկողության մասով իրավիճակի մասին՝ հաշվի առնելով այն, որ ԱՄՆ-ն դուրս է գալիս «Միջին ու փոքր հեռահարության հրթիռների ոչնչացման մասին» պայմանագրից, ինչպես նաև ամերիկյան կողմի հետ բանակցություններ սկսելու հեռանկարների մասին»,- ասել է Պեսկովը:
Պուտինն իր ՀԱՊԿ-ի գործընկերների հետ խոսել է նաև Սիրիայի իրավիճակի մասին. «Նա նաև տեղեկություն է տվել ՀԱՊԿ-ի իր գործընկերներին աստանյան ձևաչափի ներկայացուցիչների և, այսպես կոչված, Սիրիայի հարցով փոքր խմբի միջև երկխոսության մասին: Ի նկատի ունի գագաթնաժողովը, որը նախկինում Ստամբուլում էր: Նաև տեղեկացրել է սիրիական հարցի վերաբերյալ այլ նրբություններ: Քննարկվել են նաև տարածաշրջանային այլ կոնֆլիկտներ»,- ասել է ՌԴ նախագահի մամուլի խոսնակը:
