Հասարակություն 

Մարդը շատ բաների դեմ անզոր է և դրա ապացույցը Սպիտակի երկրաշարժն էր, որը խլեց 25000 մարդու կյանք

analitik.am

Նոյեմբերի 9-ին ՀՀ ԱԻ նախարարությունում կայացավ 1988 թ. Սպիտակի աղետալի երկրաշարժի 30-րդ տարելիցին ընդառաջ հրատարակված «Սպիտակի 1988 թ. երկրաշարժը լուսանկարներով, փաստերով և մեկնաբանություններով» գիրք-ալբոմի շնորհանդեսը:

ՀՀ ԱԻ նախարարի պաշտոնակատար Ֆելիքս Ցոլակյանը, ողջունելով հյուրերին և ներկաներին, անդրադարձավ գիրք-ալբոմի բովանդակությանը, որի ընթացքում մասնավորապես նշեց.

- Մարդը շատ բաների դեմ անզոր է և դրա ապացույցը Սպիտակի երկրաշարժն էր, որը խլեց 25000 մարդու կյանք, անօթևան թողեց հազարավոր մարդկանց, իսկ հանրապետության երկրորդ և մշակութային մայրաքաղաք Գյումրին զրկվեց երբեմնի հմայքից: Բայց սա մեր ազգի պատմության մի մասն է, իսկ այս գիրքը՝ գիտական վերլուծություն, որը նպատակ ունի նպաստել սեյսմիկ պաշտպանության կազմակերպմանը և բնակչության պատրաստվածության բարձրացմանը:

Նախարարը ներկայացրեց նաև գիրք-ալբոմի հեղինակին՝ երկրաբանական գիտությունների դոկտոր, պրոֆեսոր Սերգեյ Նազարեթյանին և շեշտեց, որ հեղինակը գրքում խոսում է այն ամենի մասին, ինչ անձամբ է տեսել, ուստի գիրք-ալբոմը ուրույն տեղ կգտնի 1988թ. երկրաշարժին վերաբերող ուսումնասիրությունների շարքում:

Պրոֆեսոր Ս. Նազարեթյանը նշեց, որ գիտահանրամատչելի գրքում քիչ է շեշտված աղետի ողբերգությունը, մեծ ուշադրություն է դարձված երկրաշարժի ծանր հետևանքներին և դրանց պատճառներին.

-Փորձել եմ ավելի շատ ցույց տալ, թե ինչ սխալներ են եղել ու ինչ անելիքներ ունենք, որպեսզի հետագայում խուսափենք նման երկրաշարժերից,- ընդգծեց հեղինակը:

Երկլեզու գրքում՝ հայերեն և անգլերեն, ներառված են 120 լուսանկարներ, կան 50-ից ավելի քարտեզներ, որոնք արտացոլում են սեյսմիկ վտանգի գոտիները: Գիրքն ընդգրկում է նաև երկրաշարժի հիմնական պարամետրերն ու բնութագրերը, կորուստները, սեյսմաբանական ու երկրաբանական հետևանքները, տուժածներին ցուցաբերված փրկարարական և բժշկական օգնությունը:

Երկրում հատուկ պատրաստված փրկարարների բացակայությունը դրդեց և նպաստեց հնարավորինս արագ ստեղծել և կատարելագործել փրկարարական ծառայությունը, հիմնել սեյսմիկ ոլորտի հիմնահարցերով զբաղվող ծառայություն, որոնք առաջիկայում պետք է ձևավորեին ՀՀ արտակարգ իրավիճակների նախարարությունը:

Ներկաները շնորհավորեցին և շնորհակալություն հայտնեցին հեղինակին գրքի և կատարված լայնածավալ աշխատանքի համար, իսկ հանդիպման ավարտին հեղինակը իր մակագրությամբ գրքերը նվիրեց ներկաներին:

Նույն շարքից