Իրանի միջուկային ծրագիրը սառեցման փուլ կմտնի հունվարի 20-ին, երբ ուժի մեջ կմտնի համապատասխան միջանկյալ համաձայնագիրը, հայտնում է BBC-ն` վկայակոչելով բանակցության կողմերի` Իրանի, ԱՄՆ-ի և Եվրամիության հայտարարությունները:
Նոյեմբերին մեկնարկած բանակցությունների այս ելքով նախատեսվում է Թեհրանի դեմ միջազգային պատժամիջոցների մեղմում: Ըստ ձեռք բերված արդյունքի` նախատեսվում է, որ 20%-ով հարստացված ամբողջ ուրանը կվերացվի կես տարվա ընթացքում, Ֆորդոյի ուրանի հարստացման օբյեկտը բաց կլինի փորձագետների առաջ: Ամեն ամիս ստուգումներ կանցկացվեն Արաքի ռեակտորում և այլն:
Աղբյուրի փոխանցմամբ` ԱՄՆ-ի նախագահ Բարաք Օբաման ողջունել է արդյունքը, սակայն ասել է, որ երկարաժամկետ հեռանկարում դեռ շատ աշխատանք կա:
ԵՄ-ի արտաքին քաղաքականության գերագույն հանձնակատար բարոնուհի Քեթրին Էշթոնն ասել է, որ այժմ խնդրելու են ՄԱԿ-ի միջուկային գործակալությանը հաստատել այս գործարքի կատարելությունը: Այս բանակցություններում Էշթոնը ներկայացրել էր ՄԱԿ-ի Անվտանգության խորհրդի հինգ մշտական անդամներին` ԱՄՆ-ին, Ռուսաստանին, Չինաստանին, Ֆրանսիային, Բրիտանիային, ինչպես նաև` Գերմանիային:
