Ամանորի և Սուրբ Ծննդյան տոների առթիվ վարչապետ Տիգրան Սարգսյանը ՀՀ կառավարության նիստերի դահլիճում ընդունելության է հրավիրել զանգվածային լրատվության միջոցների ներկայացուցիչներին: ՀՀ կառավարության և անձամբ իր անունից վարչապետը շնորհավորել է ներկաներին տոների կապակցությամբ՝ մաղթել բեղմնավոր և հետաքրքիր աշխատանք: Այս մասին հայտնում են ՀՀ կառավարության տեղեկատվության և հասարակայնության հետ կապերի վարչությունից։
«Զանգվածային լրատվական միջոցների դերն այսօր Հայաստանի Հանրապետությունում չափազանց կարևոր է, մանավանդ, եթե հաշվի առնենք, որ վերջին հինգ տարիների ընթացքում ժողովրդավարության ամրապնդման գործում դուք ստանձնել եք բարդ և պատասխանատու գործառույթ: Դժվար է պատկերացնել քաղաքացիական հասարակության կայացումն առանց ձեր գործուն մասնակցության, հաջողություններն այդ բնագավառում պայմանավորված են լինելու նաև ձեր արդյունավետ աշխատանքով: Հաճախ մենք խոսում ենք պատասխանատու ԶԼՄ-ների մասին, քանի որ դուք նույնպես իշխանություն եք և կարողանում եք հասարակության մեջ ստեղծել տրամադրություններ, առաջ քաշել նոր գաղափարներ և, ինչու ոչ, առաջնորդել մեր հասարակությանը: Այդ տեսակետից, կարևորում եմ այն հաջողությունները, որոնք արձանագրում ենք լրատվական դաշտում, մանավանդ, երբ տեսնում ենք խորը վերլուծական նյութեր, որոնք կարևոր են քաղաքացիական հասարակության կառուցման գործում: Այդ բնագավառում ցանկանում եմ ձեզ նորանոր հաջողություններ: Մաղթում եմ, որ 2014 թվականը մեզ բերի սեր, համերաշխություն, խաղաղություն և որ այս տրամադրություններն առաջին հերթին դուք տարածեք մեր հասարակության շրջանում»,–ինչպես նշվում է հաղորդագրությունում, ասել է ՀՀ վարչապետը։
ՀՀ կառավարության գործունեությունը մշտապես ուշադրության կենտրոնում պահելու ինչպես նաև ակտիվ համագործակցության համար ՀՀ վարչապետի հուշամեդալով, հուշանվերով՝ անվանական ժամանացույցով, և վարչապետի շնորհակալագրով են պարգևատրվել ԶԼՄ-ների մի շարք ներկայացուցիչներ:
ԽՍՀՄ հերոս, հետախույզ Գևորգ Վարդանյանին և նրա տիկնոջ` Գոհար Վարդանյանին նվիրված «Հերոս անլեգալ (ծպտյալ) հետախույզներ Գևորգ և Գոհար Վարդանյաններ. «Հպումը լեգենդին» շարունակվում է…» գրքի համար Տիգրան Սարգսյանը գրող, հրապարակախոս, լրագրող Գուրգեն Խաժակյանին պարգևատրել է Հայաստանի Հանրապետության վարչապետի հուշամեդալով:
