Կոռեկտ չէ գնահատել այլ ուժերի ցուցակները, բայց երբ ես Իմ քայլը դաշինքի ցուցակը տեսա, հազար ներողություն, քաղաքական, քաղաքագիտական գաղափարախոսություն չտեսա, հազար ներողություն, կարծես թե քաղաքական աջափսանդալ լիներ: Լրագրողների հետ զրույցի ժամանակ հայտարարել է ԱԺ փոխխոսնակ Էդուարդ Շարմազանովը, ում խոսքերով, ցուցակում հայտնվածների մի մասն ամբողջ կյանքում եղել են ԵԱՏՄ-ի, ՀԱՊԿ-ի դեմ, իսկ իրենց ղեկավարը հիմա կողմ է այդ կառույցներին: Ամբողջ կյանքում եղել են կարմիր գծերի ու տեսախցիկների դեմ, հիմա հայտնվել են մի ցուցակում, որտեղ կողմ են դրանց:
Շարմազանովի խոսքերով, լավ է, որ ցուցակում լրագրողները շատ են, բայց քաղաքականության մեջ պետք է լինի հստակ քաղաքական գիծ, արտաքին քաղաքական վեկտոր, որը չկա. «Հետո այդ կազմով ինչպես եք մարտահրավերներին դիմակայելու: Ես չեմ ասում, թե վատն են, կամ լավը, հնարավոր է շատ լավն են, խոսքը վերաբերում է քաղաքական կանխատեսելիությանը, ինչը չկա Իմ քայլը դաշինքում, իսկ կանխատեսելիությունը կարևոր է»:
Ինչ վերաբերում է ՀՀԿ-ի ցուցակին, կուսակցության խոսնակն այն համարում է նորմալ. «Մենք ազգային պահպանողական ուժ ենք: Մեր ցուցակում այն մարդիկ են, ովքեր պաշտպանում են մեր դիրքորոշումներն Արցախյան հիմնահարցում և այլ հարցերում»:
