Րոպեներ առաջ ՀՀ Վճռաբեկ դատարանը որոշում կայացրեց մասնակիորեն բավարարել ՀՀ գլխավոր դատախազ Արթուր Դավթյանի բողոքը` Վերաքննիչ քրեական դատարանի կողմից կայացրած վճռի հետ կապված:
Դատարանը միևնույն ժամանակ մերժեց Քոչարյանի պաշտպանական թիմի բողոքը:
Վճռաբեկ դատարանի վճռով ՀՀ վերաքննիչ քրեական դատարանի 2018 թվականի օգոստոսի 13-ի որոշումը բեկանվեց և ուղարկվեց նույն դատարան նոր քննության: Որոշումն օրինական ուժի մեջ է մտնում դատական նիստերի դահլիճում հրապարակման պահից, վերջնական է և ենթակա չէ բողոքարկման:
Միաժամանակ դատարանը տեղեկացրեց, որ սույն գործով հատուկ կարծիք է հայտնվել ՀՀ Վճռաբեկ դատարանի քրեական պալատի դատավոր Սերժիկ Ավետիսյանի կողմից: Վերջինս գտել է ՀՀ գլխավոր դատախազ Արթուր Դավթյանի և Քոչարյանի պաշտպանական թիմի բողոքների վերաբերյալ վարույթն անհրաժեշտ է կասեցնել և ՀՀ Քրեական դատավարության օրենսգրքի 136-րդ հոդվածի 2-րդ մասի Սահմանադրականության հարցով դիմել ՀՀ Սահմանադրական դատարան:
Նշենք, որ Վճռաբեկ դատարան բողոք ներկայացրել էին ինչպես Գլխավոր դատախազը, այնպես էլ Քոչարյանի պաշտպանական թիմը: Եթե առաջին կողմը պահանջում է կրկին կալանավորել երկրորդ նախագահին, երկրորդ կողմը պահանջում է անհիմն ճանաչել կալանավորման որոշումը և մեղադրանքի առաջադրումը:
Ավելի վաղ առաջին ատյանի դատարանը որոշում էր կայացրել Քոչարյանի նկատմամբ որպես խափանման միջոց ընտրել կալանավորումը, իսկ ավելի ուշ Վերաքննիչ դատարանը բեկանել էր առաջին ատյանի դատարանի վճիռը և ազատ արձակել երկրորդ նախագահին` անձեռնմխելիության հիմքով:
