Եթե այն տրամաբանությամբ գնանք, որ պետք չէ Վեհափառին կամ եկեղեցին պաշտպանել, ուրեմն վարչապետին էլ պետք չէ պաշտպանել, թող նա չունենա պաշտպանական, անվտանգության համակարգ, ինչի՞ց է պաշտպանվում վարչապետն իր անվտանգության համակարգով, հայ ժողովրդի՞ց: Այսօր խորհրդարանում կաթողիկոսի անվտանգությունն ապահովելու մասին օրինագծի քննարկման ժամանակ հայտարարեց ՀՀԿ խմբակցության պատգամավոր Մարգարիտ Եսայանը:
Ավելի վաղ ԵԼՔ խմբակցության պատգամավոր Ալեն Սիմոնյանը հայտարարել էր` «Այսինքն մենք Ամենայն հայոց կաթողիկոսին պաշտպանում ենք ամենայն հայոց ժողովրդի՞ց: Եթե կան ինչ-որ մարդիկ, ովքեր պետք է ոտնձգություն անեն, կառավարությունը դրա պատասխանը տվել է: Որևիցե բան չի կարող սպառնալ կաթողիկոսին: Պետք չի սա վերածել քննարկումների, թե ով է ավելի քրիստոնյա: Մնում էր կաթողիկոսին հայ ժողովրդից պաշտպանեինք»:
Եսայանի խոսքերով, պետք չէ ժողովրդի անունն այդքան շատ տալ, և քանի որ ընտրությունները մոտենում են, հասարակությունը պետք է շատ սթափ իմանա, թե ինչու կառավարությունը դեմ եղավ օրինագծերին և ինչու է իշխող ուժի խմբակցությունը դեմ. «Ես կոչ չեմ անում կողմ քվեարկել: Ես կողմ եմ քվեարկելու, ամեն մեկը թող իր խղճի մոտ քվեարկի: Պետք է սթափվել»: