Աննա Հակոբյանն այսօր իր գրասենյակում հյուրընկալեց Ամերիկայի հայ ավետարանչական ընկերակցության (AMAA Armenia ԱՀԱԸ Հայաստան) Հայաստանի տնօրեն Հարութ Ներսեսսյանին։
Պարոն Ներսեսսյանը ներկայացրեց ԱՀԱԸ-ի հիմնադրման պատմությունը, առաքելությունը, գործունեությունը, ինչպես նաև իրականացվող ծրագրերը: «Թե՛ Հայաստանում, թե՛ Արցախում իրականացվող մեր ծրագրերն ի սկզբանե զուտ մարդասիրական բնույթ են կրել, սակայն այսօր կազմակերպությունը հիմնականում կրթական ոլորտին առնչվող ծրագրեր է իրականացնում»,- ասաց Հարութ Ներսեսսյանը՝ մատնանշելով «Ավետիսյան» կրթահամալիրի օրինակը, որի նպատակն է «իրականացնել բարձրորակ նախակրթական և լրիվ միջնակարգ կրթության ծրագրեր»:
Պարոն Ներսեսսյանը Աննա Հակոբյանին իրազեկեց ընկերակցության հովանավորության ծրագրերի շահառու այն երեխաների մասին, որոնք ծայրահեղ խոցելի խմբերի՝ հիմնականում հոգեբանական, ֆիզիկական, ինչպես նաև սեռական բռնության ենթարկված երեխաներ են:
Հանդիպման ավարտին Աննա Հակոբյանը շնորհակալություն հայտնեց օգտակար տեղեկատվությամբ հագեցած հանդիպման համար՝ վստահեցնելով, որ հնարավորության դեպքում կայցելի թե՛ կենտրոն, թե՛ «Ավետիսյան» կրթահամալիր: «Եթե մեր այցելությունը կարող է աջակցություն համարվել, ապա սիրով կայցելենք: Հատկապես որ՝ բռնության ենթարկված երեխաներն առանձնահատուկ տեղ են զբաղեցնում իմ մտքում: Շատ կարևոր գործ եք անում: Այդ երեխաները հետագայում հասարակություն են մտնելու և նրանց բարօրությունը երկրի զարգացման, ապագայի, ինչպես նաև յուրաքանչյուի կյանքի որակի համար շատ կարևոր է»,- հավելեց տիկին Հակոբյանը: