Վերջին 10 տարիների ընթացքում ընդդիմությունը՝ այսօրվա իշխանությունը, զոհերի հարազատներին մի օր ԱԺ էր տանում, մի օր նախագահական, մի օր դատախազություն և այլն՝ պահանջելով բացահայտել, թե ում պատճառով են զոհերը եղել: Այսօր՝ նոյեմբերի 17-ին, լրագրողների հետ հանդիպման ժամանակ հայտարարեց ՀՀԿ խմբակցության պատգամավոր Սամվել Նիկոյանը՝ խոսելով Մարտի 1-ի դեպքերի մասին:
Նիկոյանի խոսքերով, զոհերի հարազատներն ամբողջ 10 տարի օգտագործվել են քարոզչություն իրականացնելու նպատակով. «Հիմա ասում եմ, 6 ամիս է անցել, նոր իշխանությունները, որոնք մասնակից են եղել այդ իրադարձություններին հայտնաբերել են արդյո՞ք մի դեպք, ապացուցել են արդյո՞ք, որ այդ զոհերից որևիցե մեկը զոհվել է այսինչ մարդու գործողությունների արդյունքում: Չկա նման բան:
Ես շահագրգռված եմ, որ ամեն ինչ բացահայտվի, ես տեսել եմ այդ զոհերի հարազատների արցունքները: 10 տարի առաջ ես տեսել եմ նրանց արցունքները, հուզվել եմ նրանց հետ, սպասել եմ, որ գործն առաջ կգնա: Ասում էին, որ իշխանափոխության դեպքում ամեն ինչ կբացահայտվի, հիմա այսքան ամիս անցել է, ինչո՞ւ որևիցե մեկ դեպք բացահայտված չէ: Ինչո՞ւ էին այդ ծնողներին տանում դատախազություն և նախագահական, եթե այսօր որևէ բան չէին անելու: Տարիներ շարունակ ասել են, թե այն ժամանակվա իշխանությունները վատն են, կոծկել են ամեն ինչ, հիմա նորերն են եկել, ինչո՞ւ չեն անում»:
Ինչ վերաբերում է իրավապահների կողմից պարբերաբար արվող հայտարարություններին, Նիկոյանը նշեց, որ դրանց նախ հավատացել է, սակայն հետո հասկացել է, որ դրանք ընդամենը հայտարարություններ են եղել և դրանց հետևում ապացուցողական նշանակություն ունեցող փաստեր չկան. «Վարչապետը հրապարակում հայտարարեց, թե իշխանությանը սատարում է մարդ, ով նախկինում այնպիսի բաներ է արել, որ իր մազերը բիզբիզ են կանգնել: Բա ո՞ւր է այդ մարդը, ինչո՞ւ որևէ բան չեն արել այդ մարդու մասով, եթե այնպիսի բաներ է արել, որ մազեր են բիզբիզ կանգնել: Դրա համար եմ ասում, որ հայտարարություններն առանձնապես լուրջ չեմ ընդունում»: