Ընդհանուր եվրոպական բանակը ցույց կտա աշխարհին, որ Եվրոպայում պատերազմն անհնար է, դա լավ լրացում կլինի ՆԱՏՕ-ի համար, ուստի անհրաժեշտ է շարունակել աշխատել «միասնական եվրոպական բանակ ստեղծելու տեսլականի» վրա: Այս մասին հայտարարել է Գերմանիայի կանցլեր Անգելա Մերկելը՝ Ստրասբուրգում կայացած Եվրախորհրդարանում:
«Մենք ունենք մեծ հաջողություններ ռազմական համագործակցության ոլորտում, դա լավ է և ունի աջակցություն, բայց մենք պետք է աշխատենք եվրոպական բանակ ունենալու գաղափարի վրա»,-հայտարարել է Մերկելը։
Կանցլերն ավելացրել է նաև, որ ընդհանուր եվրոպական բանակն աշխարհին ցույց կտար, որ եվրոպական երկրների միջև նոր պատերազմ չի կարող լինել․ «Եվ դա չէր լինի բանակ՝ ՆԱՏՕ-ի դեմ, դա ՆԱՏՕ-ի համար լավ լրացում կլիներ, քանի որ ոչ ոք կասկածի տակ չի դնում ԵՄ-ի և Հյուսիսատլանտյան դաշինքի դասական հարաբերությունները»,-նշել է Մերկելը: