Մենք մեր մեջ որևէ աղբի գոյությունը չենք հանդուրժելու, որովհետև մենք մի ժողովուրդ ենք, որ Սիմոն Մարտիրոսյանի, Յուրի Վարդանյանի նման տղերք ունենք, մենք հերոսներ ենք ունեցել ու ունենք: Գեղարքունիքի մարզում հայտարարել է ՀՀ վարչապետի պաշտոնակատար Նիկոլ Փաշինյանը:
Փաշինյանի խոսքերով, անընդհատ, ամեն տեղից ուզում են համոզել, որ հայերը փոքր ու խեղճ ժողովուրդ են, յոլա գնացող ժողովուրդ են. «Բայց մենք բոլորին ասում ենք` մենք փոքր ժողովուրդ չենք, կարող է փոքրաթիվ ենք, բայց մեծ ժողովուրդ ենք: Հեղափոխության իմաստը հենց դա է, որ մենք ապացուցել ենք` մեծ ժողովուրդ ենք, արել ենք մի բան, որը մեզանից առաջ աշխարհում որևէ մեկը չի կարողացել անել: Մեզանից շատերը չէին հավատում, որ սիրով ու համերաշխությամբ հնարավոր է հասնել այսպիսի փոփոխությունների, շատերն ուզում էին, որ մեր երկրում արյան գետեր հոսեն, սակայն մենք դա թույլ չենք տվել ու թույլ չենք տալու, որովհետև մենք մեծ ժողովուրդ ենք: Որևէ մեկը չփորձի մեզ ապացուցել, թե մենք անզոր ենք, մենք հաղթող են: Որևէ մեկը չփորձի մեզ հետ խոսել կարեկցանքով, թող չփորձեն խոսել սպառնալիքով, քամահրանքով: Սա Նարեկացու ժողովուրդն է, սա Մաշտոցի, Մոնթեի, մարշալ Բաղրամյանի, Տիգրան Մեծի ժողովուրդն է: Բայց մեր մեծությունը սկսում է նաև այնտեղից, որ մենք մեր հայրենիքում աղբը տեսնելիս կռանում ենք և վերցնում: Մեր մեծությամբ մենք սիրում ենք մեր հայրենիքը, ամեն մի անկյունը»: