Երեկ ռուսաստանյան հայտնի ««Русская медная компания» /РМК/ ներկայացուցիչները վարչապետի օգնական Արեն Մկրտչյանի հետ այցելել են Ալավերդի, Թեղուտ ընկերություն, որը այս տարվա հունվարի 15-ից փակ է։ Նրանք հավաքել են Թեղուտ գործազուրկ աշխատողներին և զգայացունց նորություն են հայտնել, որ հանքի սեփականատեր դարձած ВТБ բանկը համաձայնության է եկել РМК-ի հետ հանքը վերագործարկելու մասին։
ՀՀ կառավարությունն էլ հանդես է եկել որպես գործարքի «քավոր», որը տվել է իր համաձայնությունը։ «Թեղուտի» աղբյուրը հայտնեց, որ ձեռնարկություն է այցելել նաև «Русская медная компания»-ի փոխնախագահներից Յուրի Կոռոլը, սակայն նրա անունը լրահոսում չի շոշափվել։ Իսկ ռուսական ընկերության անունից հանդես է եկել հայազգի գործարար և «Нефтегазстрой» համահիմնադիր Նորայր Պետրոսյանը։ Նա խոստացել է թեղուտցիներին, որ աշխատանքից բոլոր ազատվածները վերադառնալու են ու կրկին գործի են ընդունվելու։ Իսկ վարչապետի օգնական Արեն Մկրտչյանը, որը Լոռվա մարզից «Իմ քայլը» դաշինքի ռեյտինգային թեկնածու է, հայտնել է, որ РМК-ն երկար ժամանակ ուսումնասիրություն է կատարել «Թեղուտում»․ «Այնպես չէ, որ հանկարծակի հայտնվեց ու որոշեց հանքը շահագործել ու վերագործարկել։ Երկար ուսումնասիրության արդյունքում նրանք կատարել են իրենց տնտեսական հաշվարկները, հաշվարկել են եկամուտը ու վնասները և եկել են եզրակացության, որ այո, «Թեղուտը» հնարավոր է գործարկել», - ասել է Արեն Մկրտչյանը լրագրողներին։
Սակայն հանքի նախկին աշխատակիցները, Ալավերդու բնակիչները թերահավատորեն են վերաբերվում վերագործարկման մասին լուրերին, դրանք նախընտրական հնարք են համարում։ Եւ իրոք, երեք տարի աշխատած «Թեղուտ» ՓԲ-ի սեփականատերը՝ «Վալլեքս» ընկերությունը, ահռելի պարտք ուներ ВТБ բանկին՝ մոտ 380 մլն դոլար։ Վերջին վճարումը կատարել է 2018 թվականի ապրիլի կեսերին, և այլևս պարտքի մարում չէր եղել, որից հետո հանքավայրը անցավ բանկին։ Ի՞նչ տնտեսական հրաշք կատարվեց, որ ВТБ բանկը համաձայնեց գործարքին, այսինքն, հավատաց, որ МРК ընկերությունը առնվազն 380 միլիոն դոլար կվճարի իրեն և դեռ եկամուտ կունենա։
ВТБ-ի անանուն աղբյուրը հայտնեց, որ ВТБ բանկի և РМК ընկերության միջև որևէ համաձայնություն չկա, պայմանագիր չի կնքվել։ «Թեղուտի» տնօրեն Միխայիլ Սեմյոնովին հարցրեցինք, թե արդյոք նա տեսե՞լ է РМК ընկերության և ВТБ բանկի միջև կնքված որևէ փաստաթուղթ։ «Ոչ։ Նման փաստաթղթեր չկան։ Դրանք ներկայացված չեն։ Առայժմ «Թեղուտ» գործարանը աշխատում է նախկին ռեժիմով։ Մենք ուսումնասիրում ենք ձեռնարկության հիմնական հզորությունները, հանքավայրի պաշարները, իսկ РМК ընկերության հետ մենք որևէ պայմանավորվածություն կամ հարաբերություններ չունենք»։
Միխայիլ Սեմյոնովին պաշտոնի է նշանակել ВТБ բանկի ղեկավարությունը։ Այս պաշտոնը նա ստացել է սեպտեմբերի 6-ին։ Վերջին մոտ երեք ամիսներին նա ղեկավարում է ձեռնարկության հեռանկարների վերլուծության աշխատանքները, բայց երբ դրանք կավարտվեն, Սեմյոնովը առայժմ չի կարող նշել։ Տնօրենին ևս մի քանի հարց տվեցինք։
Մանրամասն՝ սկզբնաղբյուր կայքում
