Ճիշտ կլիներ, եթե գլխավոր դատախազը կամ առաջին տեղակալը ներգրավված լինեին հենց առաջին օրվանից, տարօրինակ է, որ նոր են սկսել ներկայանալ, որովհետև ակնհայտ է, որ գործը բավականին բարդ գործ է և նույնիսկ Հոկտեմբերի 27-ի գործով գլխավոր դատախազը ներկա չի եղել: Այսօր՝ նոյեմբերի 28-ին, լրագրողների հետ զրույցում հայտարարեց Ռոբերտ Քոչարյանի փաստաբաններից Արամ Օրբելյանը՝ խոսելով երկրորդ նախագահի խափանման միջոցի հարցի քննությանը գլխավոր դատախազի ներկայության մասին և իր տարակուսանքը հայտնելով այս մասով:
Հիշեցնենք, որ Վերաքննիչում շարունակվում է Քոչարյանի խափանման միջոցի հարցի քննությունը: Գլխավոր դատախազ Արթուր Դավթյանը հայտարարել է, թե անհրաժեշտություն կա, որպեսզի Ռոբերտ Քոչարյանը քննության այս փուլում գտնվի կալանքի տակ:
Քոչարյանի խափանման միջոցի հարցի քննությունը Վերաքննիչ քրեական դատարանում մեկնարկեց երեկ, սակայն հետաձգվեց մինչև այսօր ժամը 12:00-ն, քանի որ պաշտպանական կողմը միջնորդություն է ներկայացրել՝ պահանջելով դատավորի ինքնաբացարկը: Հարցի քննությունը երեկ չէր ավարտվել և շարունակվում է այսօր:
