Այսօր՝ նոյեմբերի 29-ին, Ճամբարակում քաղաքացիների հետ հանդիպմանը Նիկոլ Փաշինյանը խոսեց օրեր առաջ արած իր այն հայտարարության մասին, որ ինքը Հայաստանի առաջին ղեկավարն է, ում որդին ծառայում է Լեռնային Ղարաբաղի Հանրապետությունում. «Երեկ երեկոյան ժամանակ ունեի, որոշեցի մի քիչ հետևել, թե ինչ է կատարվում համացանցում: Զարմանքով նկատեցի մի այսպիսի բան. Իմ հայտարարությունների վերաբերյալ նյութեր նկատեցի, թե իբր դա շահարկում է: Ես շատ պարզ բան եմ ասել, որ ես Հայաստանի առաջին ղեկավարն եմ, ում որդին ծառայում է ԼՂՀ-ում: Բնականաբար, այս շարքում նկատի եմ ունեցել Լևոն Տեր-Պետրոսյանին, Ռոբերտ Քոչարյանին և Սերժ Սարգսյանին: Սարգսյանը որդի չունի: Գրել են, թե ինչպես կարելի է այսպես ասել: Ես գիտեմ, որ Տեր-Պետրոսյանի որդին ծառայել է: Ես վերնագրեր տեսա, որ Ռոբերտ Քոչարյանի որդիները ծառայել են: Ես չհասկացա նաև Ղարաբաղի իշխանության ներկայացուցիչների արձագանքը: Ես ընդհանրապես վերջին օրերին լավ չեմ հասկանում ԼՂՀ իշխանության ներկայացուցիչների ակտիվությունը: Բացարձակապես չեմ հասկանում, թե ինչի են ակտիվացել, տարբեր մեկնաբանություններ անում և ինչու են փորձում որևէ ձևով խառնվել և իրենց ներկայությունը ցույց տալ ՀՀ-ում խորհրդարանական ընտրությունների քարոզարշավի ընթացքում: Ես շատ հարցեր ունեմ դրա կապակցությամբ, դրանք անպայման կքննարկեմ Բակո Սահակյանի հետ: Իսկ մինչ այդ Սահակյանին հորդորում եմ, որ Արցախի կառավարության ներկայացուցիչներին կարգի հրավիրի և նրանց ուղարկի իրենց աշխատանքով զբաղվելու:
Չհասկացա, Ղարաբաղի նախագահի մամուլի խոսնակն օր ու մեջ իմ ասածի վերաբերյալ մեկնաբանություն է տալիս: Այ քեզ բան: Պատկերացնո՞ւմ եք իմ խոսնակը Ղարաբաղի հայտնի ու անհայտ իրադարձությունների վերաբերյալ մեկնաբանությունենր տա: Դուք հասկանո՞ւմ եք, թե դրա հետևանքն ինչ կլինի: Սթափվեք հարգելիներս, և զբաղվեք ձեր աշխատանքով: Իհարկե ես ձեզ հետ կքննարկեմ այն, ինչ տեղի է ունեցել, բայց ընտրություններից հետո: Իսկ մինչ այդ ասում եմ՝ զբաղվեք ձեր գործով»:
Հիշեցնենք, որ իր վերոնշյալ հայտարարության մեջ Փաշինյանը բառացի ասել էր նաև հետևյալը, որ նույնիսկ ղարաբաղցի ղեկավարների տղաները չեն ծառայել Ղարաբաղում ու ընդհանրապես չեն ծառայել։
Հիշեցնենք նաև, որ նշյալ թեմայի շուրջ Analitik.am-ը զրուցել էր Արցախի նախագահ Բակո Սահակյանի աշխատակազմի ղեկավարի տեղակալ Դավիթ Բաբայանի հետ: