Իմ քայլը դաշինքի առաջին համար, վարչապետի պաշտոնակատար Նիկոլ Փաշինյանը Եղվարդում քարոզարշավի շրջանակներում կրկին խոսեց Հայաստանում մեկնարկող տնտեսական հեղափոխության մասին, որը պետք է հաջորդի քաղաքական հեղափոխությանը և որի համար անհրաժեշտ է, որ մարդիկ վերափոխվեն:
Փաշինյանը վերափոխման մասով խոսեց իր օրինակի մասին՝ հայտարարելով, որ իր կյանքը սկսել է որպես մի քաղաքացի, ով ծխում էր ու ծխախոտը գցում գետնին. «Ես մինչև 2004 թվականը ծխում էի, հետո թողեցի ու հիմա բոլորին նույնն էմ խորհուրդ տալիս: Իմ վերափոխումը տեղի ունեցավ այն ժամանակ, երբ ուրիշի գցած աղբը վերցրեցի ու գցեցի աղբամանը: Նրանք երկու տարբեր մարդիկ են: Մեկը մարդ է, ով հարմարվում է իրականությանը, մյուսը մարդ, ով համարում է, որ իր ջանքով կարող է փոխել իրականությունը: Մեր իրականությունը փոխվեց, որովհետև ձեզանից յուրաքանչյուրն այն մարդն է, ով կարող է փոխել իրականությունը»:
Փաշինյանի խոսքերով, այսօր ոմանք հարցնում են, թե ինչ է փոխվել. «Հայաստանում այն է փոխվել, որ դուք ծակերն եք մտել ու չեք կարողանում դուրս գալ: Ու դուրս չեք գալու, մինչև քավարանի միջով չանցնեք ու օրինապաշտ քաղաքացի չդառնաք»:
Ինչ վերաբերում է կոռուպցիային, վարչապետի պաշտոնակատարը հայտարարեց, որ այսօր էլ կաշառք վերցնելու դեպքեր լինում են, սակայն բոլորն էլ բացահայտվելու են: Փաշինյանը չի կարողանում հասկանալ նրանց, ովքեր նոր Հայաստանում կաշառք են տալիս, իսկ պաշտոնյաները, ովքեր կաշառք են վերցնում, վարչապետի պաշտոնակատարի խոսքերով, առնվազն ծալը պակաս պետք է լինեն:
