Բայղուշություններին ուշադրություն պետք չի դարձնել, իսկ ընդհանրապես այս ընտրություններով արժե բոլոր բայղուշներին դուրս շպրտել քաղաքական դաշտից, որպեսզի իրենց բայղուշությանը վերջ տան: Այս մասին Մեղրիում քարոզարշավի ժամանակ հայտարարեց «Իմ քայլը» դաշինքի առաջին համար Նիկոլ Փաշինյանը:
Փաշինյանի խոսքերով, այսօր իշխանությունը հարյուր տոկոսով պատկանում է ժողովրդին. «Այսօր, ըստ էության, գործող կառավարություն, գործող Ազգային ժողով չկա: Միայն դուք եք որոշելու ապագա կառավարության ճակատագիրը: Ասվածի մեջ ոչ մի չափազանցություն չկա: Սրանից հետո ընտրություններում ոչ մի ձայն չի կեղծվելու, ոչ մի քվեաթերթիկ չի գողացվելու, և Հայաստանի իշխանության ճակատագիրը որոշելու եք միայն դուք: Մեր հեղափոխության ամենակարևոր իմաստը եղել է հենց դա, որ ՀՀ քաղաքացին իրեն տեր զգա»:
Վարչապետի պաշտոնակատարը նշեց, որ իր քաղաքական կարիերայի ընթացքում միշտ փորձել է համոզել մարդկանց, որ ամեն մեկի քվեն ամենակարևորն է. «Ես ուզում եմ մի պարտավորություն ստանձնել: Երբեք մեր կառավարությունը չի կեղծի ձեր մի հատիկ քվեն որևէ նպատակով: Մենք ատամներով ու եղունգներով իշխանությունը պահելու փորձ չենք անելու: Մենք հասկանում ենք, որ իշխանությունը մերը չէ, այն ձերն է: Դուք այս ընտրություններով կառավարությանը, պատգամավորներին ընդունում եք ձեզ մոտ աշխատանքի: Եթե ձեզ ծառայելու մանդատը շնորհեք ինձ, ինձ համար մեծ պատիվ կլինի ձեզ ծառայելը, ինչպես դա անում եմ արդեն 27 տարի»:
