Քննություն կա: Ցանկացած ավիացիոն միջադեպ, անկախ քրեական գործից, ունի մասնագիտական քննության հանձնաժողով: Մասնագիտական քննությունը կավարտվի, բոլորը կիմանան, եկեք չշտապենք, սպասենք: Լրագրողների հետ զրույցում հայտարարել է ՀՀ ՊՆ մամուլի խոսնակ Արծրուն Հովհաննիսյանը՝ խոսելով դեկտեմբերի 4-ին երկու օդաչուի կյանք խլած ավիավթարի պատճառների մասին:
Անդրադառնալով զոհված օդաչուներին, Հովհաննիսյանը նշել է, որ նրանք իրար հետ շատ են թռիչքներ իրականացրել, Արմեն Բաբայանը եղել է մեծ թվով օդաչուների ինստրուկտորը:
Հարցին, թե հնարավոր է արդյո՞ք, որ միասին աշխատելու խնդիր եղած լինի, Հովհաննիսյանը բացառեց. «Ես քննությանը կարող եմ ընդհանրապես չսպասել ու բացառել ինչ-որ անձնային խնդիրները»:
Թռիչքը եղել է ուսումնավարժական, օրվա առաջին թռիչքը, որը երբեմն անվանվում է հետախուզական թռիչք:
