Քարոզարշավը շատ մեծ խնդիրներ առաջացրեց գործող իշխանությունների համար, իսկ ընտրությունները Հայաստանի պատմության մեջ երբևէ եղած ամենախայտառակ ընտրություններն են: Այսօր՝ դեկտեմբերի 9-ին լրագրողների հետ զրույցում հայտարարել է ՀՀԿ ցուցակով ընտրություններին մասնակցող Դավիթ Շահնազարյանը:
Շահնազարյանի խոսքերով, քարոզարշավը զուգորդվել է սպառնալիքներով, բռնություններով և իշխող ուժի կողմից տեղացող հայհոյանքներով. «Այսօր մեզ համար մեր երկրի, մեր ապագայի համար շատ կարևոր օր է, և ես կասկած չունեմ՝ բոլոր նրանք, ովքեր իրենց համարում են ՀՀ քաղաքացի, կատարելու են ճիշտ ընտրություն: Ես մի քվեաթերթիկը դրեցի ծրարի մեջ, երկուսն էլ ՝գրպանս, որովհետև չէի ուզում մյուսների նման նետել աղբարկղը, դրանք ցույց կտամ այսօր ժամը 20:00-ից հետո, ՀՀԿ գրասենյակում»:
Անդրադառնալով ԱԱԾ տնօրեն Արթուր Վանեցյանի հայտարարությանը, որ ԱԱԾ-ն հիմքեր չունի իրեն բերման ենթարկելու համար, Շահնազարյանը հայտարարեց, որ վերջինս դա չի կարող իմանալ, քանի որ ամեն ինչ Փաշինյանն է որոշում. «Այլ բան, եթե դեռևս նրան տեղյակ չի պահել: Իսկ որ Փաշինյանը նման բան երազում է, ես կասկած չունեմ, բայց վախենում է: Տեսնենք դուխը կհերիքի՞, թե՝ ոչ: Նա իրենից էլ է արդեն վախենում: Վանեցյանը նաև ասել է, որ ես մեղադրանք եմ հնչեցրել, բայց հիմքեր չկան: Ես հայտարարում եմ, որ Փաշինյանն իրականացնում է իշխանություն՝ Արցախի դիմաց քաղաքականություն և իմ ասուլիսում մանրամասն ներկայացրել եմ այն հիմքերը, փաստերը, որոնք ապացուցում են իմ ասածը: Ես իրավական մեղադրանք Փաշինյանին այդ առումով չեմ ներկայացնում: Հիմա ինքն իրեն մեղադրել է պետական դավաճանության մեջ: Նման տարրեր հավանաբար ԱԱԾ-ն է տեսել Փաշինյանի ասածից հետո, երբ ինձ հրավիրեցին ԱԱԾ: Դա կատարվեց այն բանից հետո, երբ Փաշինյանը հրապարակայնորեն հայտարարել էր, որ ինձանով պետք է զբաղվի ԱԱԾ-ն, որն օպերատիվորեն կատարեց այդ հրահանգը: Փաշինյանին ես հրավիրել էի ուղիղ եթերում բանավեճի»:
Այն պահին, երբ լրագրողները զրուցում էին Շահնազարյանի հետ, ինչ-որ երիտասարդ փորձում էր խանգարել՝ վիրավորանքներ հասցնելով վերջինիս հասցեին, ով կոչ արեց ոստիկանությանը կատարել իրենց պարտականությունները՝ նշելով, որ հակառակ դեպքում ինքը դա կանի, ու կլինեն մարմնական վնասվածքներ: