ՀՀ սպորտի և երիտասարդության հարցերի նախարարության կողմից արդեն երրորդ տարին անընդմեջ իրականացվում է «Երիտասարդական մրցանակաբաշխություն» ծրագիրը:
Ծրագրի նպատակն է հանրային կյանքին երիտասարդների մասնակցության խթանումը, ՀՀ սոցիալ-տնտեսական խնդիրների լուծման գործընթացների մեջ երիտասարդների ներգրավվածության բարձրացումը, 2018 թվականի ընթացքում նշանակալի հաջողություններ ցուցաբերած երիտասարդների, երիտասարդական խմբերի ձեռքբերումների արժևորումը:
Հանրության կողմից օնլայն առաջադրվել են 2018 թվականի ընթացքում իրենց նշանակալի ձեռքբերումներով աչքի ընկած 16-35 տարեկան երիտասարդների, երիտասարդական խմբերի (խմբի անդամներից առնվազն մեկը պետք է լինի երիտասարդ) թեկնածությունները հետևյալ 11 անվանակարգերում՝
- հայրենիքի երիտասարդ պաշտպան
- երիտասարդ մշակութային գործիչ/կոլեկտիվ
- երիտասարդ բժիշկ
- երիտասարդ մարզիկ
- երիտասարդ գիտնական
- երիտասարդ գործարար
- երիտասարդ բնապահպան
- երիտասարդ գյուղատնտես
- երիտասարդական աշխատող
- երիտասարդ հայրենադարձ
- տարվա երիտասարդ
Յուրաքանչյուր անվանակարգում նախնական ընտրությունն անցած 3 թեկնածուները (ընդհանուր առմամբ՝ 33 թեկնածու) կմասնակցեն եզրափակիչ միջոցառմանը: Հրավիրված 150 հյուրերը՝ նրանց թվում նաև նախարարներ և պաշտոնատար այլ անձինք, օնլայն քվեարկությամբ կորոշեն տարվա 11 լավագույն երիտասարդներին: