Առաջին անգամ, երբ ՀՀ առաջին նախագահը գնաց Արցախ, դրա հետևանքը եղավ այն, որ Արցախի այն ժամանակվա գերագույն խորհրդի նախագահ Գեորգի Պետրոսյանը պաշտոնանկ արվեց: Այս անգամ Հայաստանից պաշտոնատար անձ չգնաց, այնտեղից հրավիրվեց Արցախի նախագահը, որին հաջորդեց Լևոն Մնացականյանի պաշտոնանկությունը: Այս մասին այսօր լրագրողների հետ հանդիպման ժամանակ հայտարարեց ՀՀ նախկին ՄԻՊ Լարիզա Ալավերդյանը:
Տիկին Ալավերդյանը նշեց, որ ինքը չի կարող դատել, թե որքանով են այս զուգահեռներն էական, չի կարող ասել նաև, թե ինչ կապ կա Բակո Սահակյանի հայաստանյան այցի և Արցախում պաշտոնանկությունների միջև, սակայն, քանի որ երկու իրադարձությունները զուտ ժամանակային առումով համընկել են, վարկածը, որ դրանք իրար հետ կապ ունեն, լինելու է:
Նախկին ՄԻՊ-ը կարծում է, որ Լևոն Մնացականյանը լուրջ նշաձող է սահմանել և ով էլ փոխարինի նրան, պետք է ձգտի առնվազն պահպանել այդ մակարդակը. «Բայց մի բան կա, որը ես հստակ պետք է ասեմ: Ես բացասական եմ գնահատում այնպիսի արտահայտությունները, երբ պետության բարձրաստիճան անձն այնպես է անդրադառնում, ինչպես արեց պարոն Փաշինյանը՝ կոշտ, ոչ բարձր պաշտոնական անձին հարիր արտահայտություններով: Խոսքը վերաբերում է այն հայտարարություններին, երբ նա ասաց, որ Արցախում Բակո Սահակյանը պետք է կարգի հրավիրի պաշտոնյաներին: Ես անգամ իմ աշխատողներին այդպես չեմ դիմել: Ինձ համար մերժելի է այդ բառապաշարն ու տոնայնությունը»: