2008 թվականի հայտնի դեպքերի ժամանակ տվյալներ են եղել, որ տարբեր զորամասերում աշխատանքներ են տարվում անձնակազմերի հետ, որպեսզի զինվորականներին ներքաշեն քաղաքական գործընթացների մեջ: Կոնկրետ ով որ զորամասում ինչ աշխատանք է տարել, ասել չեմ կարող, այդ օպերատիվ տվյալներն ԱԱԾ-ում են: Այս մասին լրագրողների հետ զրույցում հայտարարեց Ռոբերտ Քոչարյանի փաստաբաններից Հայկ Ալումյանը:
Ալումյանի խոսքերով, այս մասով իրենց ասածներին կարող էին նաև չհավատալ, սակայն օրեր առաջ այն ժամանակ Լևոն Տեր-Պետրոսյանին միացած ՊՆ փոխնախարարներից Գագիկ Մելքոնյանը հայտարարել է, որ հատուկ գնդի 80 տոկոսը պատրաստ է եղել միանալ ցուցարարներին. «Այդ պահին Հանրապետության նախագահը պատասխանատու է եղել յուրաքանչյուր բնակչի համար: Եթե ստացվեր այնպես, որ Հայաստանի տարբեր տարածքներից զինված կամ չզինված զինվորականներ գային Երևան, դուք պատկերացնո՞ւմ եք, թե ինչ կարող էր տեղի ունենալ Հայաստանում: Այս ամեն ինչն անհրաժեշտ էր կանխել: Ժամանակը կգա, որ բոլորը շնորհակալ կլինեն նրանց, ովքեր այդ պահին դա կանխել են»:
Ալումյանի խոսքերով, վերոնշյալ սցենարը կանխելուն է ուղղված եղել հայտնի 0038 հրամանը:
