Այսօր կառավարության մոտ բողոքի ակցիա էին իրականացնում մի խումբ քաղաքացիներ, ովքեր իրենց խաբված են զգում Հյուսիսային պողոտայի կառուցման արդյունքում: Քաղաքացիների խոսքերով, իրենց հայտարարվածից քիչ փոխհատուցում են տվել, ինչի արդյունքում իրենք նաև զրկվել են իրենց բնակարաններից, որոնք եղել են Երևանի կենտրոնում՝ Կարապի լճի մոտ:
Ակցիայի մասնակից կանանցից մեկը հայտարարեց, որ պողոտայի կառուցման ժամանակ քանդել են իր բնակարանը, որը պատմական հուշարձան է եղել, Զախարյանը հայտարարել է, որ իրենց քառակուսիմետրի համար 1000 դոլար են տվել, սակայն իրականությունն այն է, որ 230-270 դոլար փոխհատուցում է տրվել: Կնոջ համար անհասկանալի է, թե ինչու այսօրվա իշխանությունները պատասխանատվության չեն կանչում Քոչարյանին, Զախարյանին և Նարեկ Սարգսյանին. «Ինչու ես հիմա պետք է քաղաքի կենտրոնում չապրեմ, որտեղ 3 հարկանի տուն ունեի: Իսկ հիմա իմ երեխաներից մեկը տուն չունի, մյուս երեխաս էլ 9-րդ Մասիվում է ապրում: Մեր տների տարածքն էլ վաճառում են 4000 դոլարով: Վարչապետը մեզ խոստումներ էր տալիս, որ լավ կլինի, ինչու չի անում»:
Ակցիայի մասնակից մեկ այլ կին էլ հայտարարեց, որ այսօրվա իշխանություններն իրենց բանի տեղ չեն դնում. «Մենք շատ ուրախ ենք, որ նախկինների երեսը չենք տեսնում, որ ռևոլուցիա է եղավ: Բայց Փաշինյանը ժողովրդի ընտրյալն է, պարտավոր է ժողովրդի մասին մտածել: Մեծ կանայք ենք, ամաչում ենք արդեն, որ փողոցում կանգնում գոռում ենք: Սակայն ոչ նրանք, ոչ էլ սրանք մեզ բանի տեղ չեն դնում: 6 դիմում ենք գրել՝ 1-ը Փաշինյանին, 5-ն էլ քաղաքապետարան, 6-ն էլ մերժվել են»:
