Գերմանիայի արտգործնախարար Ֆրանկ Վալտեր Շտայնմայերը Ուկրաինայի քաղաքական ճգնաժամի կարգավորման գործում ակնկալում է Ռուսաստանի մասնակցությունը։ Այս մասին նա հայտնել է Աթենքում ԵՄ անդամ երկրների արտգործնախարարների հանդիպման կուլուարներում, հայտնում է Deutsche Welle-ն՝ վկայակոչելով AFP-ն։
«Մենք չենք կարող անուշադրության մատնել այս կոնֆլիկտը, բայց Ռուսաստանի կարիքն ունենք Ուկրաինայի իրավիճակի կայունացման ուղղությամբ աշխատելիս», - ասել է նախարարը եւ հույս հայտնել, որ Ռուսաստանը կնպաստի ուկրաինական տնտեսության կենսունակության պահպանմանը, որը առաջիկա տարիներին մեծ հաջողություններ կունենա»։
Նրա խոսքով՝ Ռուսաստանն էլ է շահագրգռված, որ Ուկրաինան քաղաքական եւ տնտեսական կրախի առաջ չկանգնի։
Միեւնույն ժամանակ, Ուկրաինան պետք է քաղաքական պայմաններ ստեղծի՝ տնտեսական օգնություն ստանալու համար: Շտայնմայերն այդ պայմաններից նշել է «կոռուպցիայի դեմ ակտիվ պայքարը», «սահմանադրական բարեփոխումների՝ վստահություն ներշնչող գործընթացը» եւ անցյալի հանցագործությունների բացահայտումը:
Գերմանիայի արտգործնախարարը նորից կոչ է արել Միջազգային կոնտակտային խումբ ստեղծել՝ Ռուսաստանի եւ Ուկրաինայի մասնակցությամբ:
