Թուրքիայի արտգործնախարար Ահմեթ Դավութօղլուն զանգահարել է ԱՄՆ-ի պետքարտուղար Ջոն Քերիին, երբ հայտնի է դարձել, որ Սենատի Արտաքին հարաբերությունների հանձնաժողովը բանաձև է ընդունել Հայոց ցեղասպանության հարցով, այս մասին հայտնում է Hurriyet Daily News -ը:
Ահմեթ Դավութօղլուն ասել է, թե Թուրքիան «բացասական ակնկալիք չունի բանաձևից»: Նա նշել է, որ Թուրքիայի կառավարությունը քայլեր է ձեռնարկում այն նախաձեռնությունների դեմ, որոնք անհանգստացնում են Թուրքիային, և իրենք հուսով են, որ ամերիկացիները նման վերաբերմունք չեն ցուցաբերի:
Թերթի հետ զրույցում նա պատմել է նաև, որ հեռախոսազրույցով ինքն ու Ջոն Քերին քննարկել են իրադրությունը Սիրիայում և Եգիպտոսում:
Պարբերականը հիշեցնում է, որ անցած շաբաթ ԱՄՆ-ի չորս կոնգրեսականներ բանաձև էին ներկայացրել Բարաք Օբամային՝ կոչ անելով խրախուսել հայ-թուրքական հարաբերությունների բարելավումը։ Միաժամանակ ներկայացվել էր նաև վերոհիշյալ բանաձևը: