Գերմանական «Der Tagesspiegel» պարբերականը հոդված է հրապարակել Գերմանիայում հայկական քրեական խմբավորման մասին, որն ավելի հայտնի է «հայկական մաֆիա» անունով, գրում է Ռուսարմինֆոն, որը հոդվածը հրապարակել է «Գերմանիայում հայկական մաֆիան ակտիվացել է Նիկոլ Փաշինյանի այցի ֆոնին» վերնագրով:
Հոդվածում նշվում է՝ Գերմանիայի կառավարությունը, պատասխանելով Ձախերի կուսակցության հարցմանը, արդեն հաստատել է այն փաստը, որ երկրում հանցավոր խմբավորում է գործունեություն ծավալում, որի հիմքը կազմում են էթնիկ հայերը, որոնց տեղակայման հիմնական վայրը Թյուրինգիան է: Հայկական խմբավորման անդամները, որոնց նկատմամբ հատուկ օպերացիա է իրականացվում, կասկածվում են փողերի լվացման, խարդախության, բռնություն գործադրելու մեջ: Այս պահին մեղադրանք է առաջադրվել միայն մեկ մարդու:
Դաշնային կառավարությունը նաև հաստատել է 2018 թվականին մամուլում հայտնված տեղեկությունները, որ Գերմանիայում Հայաստանի դեսպանը ներգրավված է եղել հայկական խմբավորման նկատմամբ հետաքննությանը: Սակայն նշվում է, որ նա կասկածյալ չէ, այլ ուղղակի իր կամքով 2017 թվականին այցելել է Ներքին գործերի նախարարություն:
Պարբերականը հավելում է, որ դաշնային կառավարության պատասխանը շատ անհարմար պահի է ստացվել, քանի որ համընկել է ՀՀ վարչապետ Նիկոլ Փաշինյանի՝ գերմանիա կատարած այցի և կանցլեր Անգելա Մերկելին հանդիպելու հետ:
