Հասարակություն 

Պա՛հն է պատասխանատվության և զարթոնքի. Հայտարարություն

1918 Մայիս, 1989 Դեկտեմբեր, 1991 Սեպտեմբեր, 2018 Մայիս՝ թվականներ, որոնք հիմնարար հանգրվաններն են մեր պետականության և ժողովրդի վերածննդի:

Անկախ է պետությունը, ազատագրված է Արցախը, զարթնել է ժողովուրդը:

Սակայն պատմական ներկա իրավիճակը և դեպքերի ընթացքը չեն կարող բավարար համարվել: Մեր պարտքն է տեր կանգնել մեր ճակատագրին և դիմակայել համաղետային սպառնալիքներին՝

Համամոլորակային տաքացման և ռեսուրսների սպառման ճգնաժամին,

Պատմական հայրենիքի ամբողջ տարածքում ժողովրդագրական ահագնացող աղետին,

Հայաստանի Հանրապետության թերզարգացածությանը,

Հայրենի գյուղական բնակավայրերի ամայացմանը,

Ավանդական մեր արժեքների ոտնահարմանը,

Հասարակական և քաղաքական խորացող պառակտմանը, պատեհապաշտությանը, արկածախնդրությանը և սպասվող հերթական հիասթափությանը,

Հայաստանին և Արցախին պարտադրված աշխարհաքաղաքական անօրինական շրջափակմանը,

Արցախի՝ Հայաստանի Հանրապետության միացման հապաղմանը,

Սփյուռքի՝ հայրենիքից անջրպետմանը եւ արագընթաց ուծացմանը,

Աշխարհաքաղաքական մեր մեկուսացմանը,

Արեւմտահայության անժամանցելի իրավունքների շարունակվող, անընդունելի ոտնահարմանը:

Ահա՛, այս գիտակցությամբ, հռչակում ենք ԱՅԳ Կուսակցության ստեղծումը:

Ով հա՛յ ժողովուրդ, Ժա՛մն է սթափվելու և համախմբվելու, Պա՛հն է պատասխանատվության և զարթոնքի, Առի՛թն է մեր արժեքները, ավանդությունները, ժառանգությունը գիտակցելու, Ատե՛նն է համահայկական ներուժի համարկման և զորաշարժի:

Ոչինչ կորած չէ, Մեր կա՛մքն աննկուն է, Ազատական-Պահպանողականների աշխատանքի ժամանակն է, Համախմբված, հաշտ, պարկեշտ, գիտակից և պատասխանատու քաղաքական գործունեության ժամանակն է, ԱՅԳ-ի Համազգային ծրագրի շուրջ համախմբվելու ժամանակն է:

Միացե՛ք ԱՅԳ-ին եւ կապրենք նոր Այգաբաց:

 

(ԱՅԳ - ՀԱՊԿ) Հիմադիր խորհրդի ներկայացուցիչ՝ Վահագն Չախալյան

ԱՅԳ • Համահայկական Ազատական-Պահպանողական Կոսակցության

  • 166
  •  
  •  
  •  
  •  
  •  
  •  
  •  
  •  
    166
    Shares

Նույն շարքից