«Christian Science Monitor» միջազգային պարբերականը փետրվար ամսվա համարում անդրադարձել է ՀՀ վարչապետ Նիկոլ Փաշինյանին Հայաստանում տեղի ունեցած ներքաղաքական զարգացումների համատեքստում: «Արմենպրես»-ի հաղորդմամբ, «Բանտից՝ վարչապետ» խորագրով հրապարակումը սկսվում է 2008 թվականի մարտի 1-ի զարգացումների նկարագրությամբ: Պարբերականը ներկայացնում է այդ օրերին Հայաստանում տեղի ունեցած իրադարձությունները և նշում, որ առաջնագծում գտնվող քաղաքական գործիչների շարքում էր Նիկոլ Փաշինյանը: Թեժացած իրավիճակի հետևանքով մայրաքաղաքում 10 մարդ զոհվեց, որից հետո երկրում հայտարարվեց արտակարգ դրություն, ակտիվ քաղաքական գործիչները, այդ թվում Նիկոլ Փաշինյանը հետապնդման ենթարկվեցին: Նա ստիպված եղավ երկու տարի անցկացնել բանտում:
Պարբերականն անդրադարձ է կատարում 2018 թվականի Հայաստանի ներքաղաքական զարգացումներին, երբ Նիկոլ Փաշինյանը, քայլերթը սկսելով Գյումրիից, հասավ մայրաքաղաք՝ փողոց դուրս բերելով հազարավոր մարդկանց: Նրանք դեմ էին արտահայտվում գործող իշխանությանն ու այդ ժամանակ երկրի ղեկավար Սերժ Սարգսյանին:
«Այս փոքր երկիրը, որը գտնվում է Հարավային Կովկասում, իրականացրեց խաղաղ հեղափոխություն: Բողոքի ակցիայի մասնակիցները դիմեցին անհնազանդության: Արդյունքում՝ Սերժ Սարգսյանը հրաժարական տվեց՝ անելով հետևյալ հայտարարությունը. «Նիկոլ Փաշինյանը ճիշտ էր, ես՝ սխալ»,-նշել է պարբերականը: Հոդվածում նշվում է, որ հայաստանյան վերջին քաղաքական զարգացումները ցույց տվեցին, որ հետխորհրդային տարածքում Հայաստանն այն երկրներից է, որտեղ ձևավորվեց ժողովրդավարության նոր մոդել:
Լրագրող, հեղափոխական, ընդդիմադիր առաջնորդ Նիկոլ Փաշինյանը դարձավ երկրի վարչապետ: Պարբերականը պատմում է, որ Նիկոլ Փաշինյանը վարչապետ դառնալուց հետո ընտանիքով տեղափոխվեց կառավարական առանձնատուն և խոստացավ իր հայրենակիցներին լինել առավել թափանցիկ:
