«Սիրելի ընկերներ
Եվս մեկ կարևոր բարեփոխում՝ այս անգամ զանգվածային լրատվության միջոցների մեր գործընկերների համար: Իրավական ակտերի նախագծերի միասնական հարթակում հանրային քննարկման է դրվել «Պետական տուրքի մասին» օրենքում լրացում կատարելու նախագիծ, որով առաջարկում ենք ԱՆ իրավաբանական անձանց պետական ռեգիստրում պահվող տեղեկությունների տրամադրման համար պետական տուրքի վճարումից ազատել հաշվառված լրատվության միջոցներին՝ բացառությամբ այն դեպքերի, երբ մեկ ամսվա ընթացքում պահանջվող տեղեկությունների քանակը գերազանցում է տպագրված կամ պատճենահանված 10 էջը:
Պետռեգիստրում պահվող տեղեկությունները ԶԼՄ-ներին անվճար ճանապարհով հասանելի դարձնելու մասին շատ ենք խոսել, այս պահին առաջին և կարևոր քայլն արված է նախագծի տեսքով: Առաջարկների համար բաց ենք, վստահ եմ՝ դրանք շատ են լինելու: Հենց այդ նպատակով ակնկալում եմ ստանալ խնդրով մտահոգ բոլոր գործընկերներիս կառուցողական առաջարկությունները՝ դրանք նախագծում ներառելու համար»,-այս մասին ֆեյսբուքյան իր էջում գրել է ՀՀ Արդարադատության նախարար Արտակ Զեյնալյանը:
