ՀՀ ԱԳ նախարար Էդվարդ Նալբանդյանը հունիսի 30-ին ընդունել է Իսպանիայի Սենատի անդամ Ուրկո Այարտզա Ազուրտզային՝ Հայաստանի Եվրոպացի բարեկամներ կազմակերպության տնօրեն Էդուարդո Լորենզո Օչոայի ուղեկցությամբ: Նախարար Նալբանդյանը կարևորել է երկկողմ հարաբերությունների զարգացման գործում խորհրդարանական դիվանագիտության դերակատարությունը:
Էդվարդ Նալբանդյանը ողջունել է իսպանացի սենատորի այցն Արցախ՝ նշելով, որ նման այցելությունները հնարավորություն են տալիս առաջին ձեռքից ծանոթանալու Լեռնային Ղարաբաղի հիմնախնդրին և տեղում առկա իրավիճակին:
Շնորհակալություն հայտնելով ընդունելության համար` սենատոր Ազուրտզան ընդգծել է, որ իր համար շատ կարևոր էր այցելել Հայաստան և Արցախ ու վստահեցրել, որ շարունակելու է իր գործունեությունն` ուղղված հայ-իսպանական փոխգործակցության առավել ամրապնդմանն ու խորացմանը:
Նախարար Նալբանդյանը ներկայացրել է ղարաբաղյան հիմնախնդրի կարգավորման ուղղությամբ Հայաստանի և ԵԱՀԿ Մինսկի խմբի համանախագահ երկրների կողմից գործադրվող ջանքերը:
Զրույցի ընթացքում մտքեր են փոխանակվել Հայաստան և Եվրոպական միություն համագործակցության շուրջ:
