Այսօր կայացած մամուլի ասուլիսի ժամանակ ՀՀ վարչապետ Նիկոլ Փաշինյանի տիկին Աննա Հակոբյանը, պատասխանելով լրագրողի այն հարցին, թե արդյոք Շվեյցարիայում շքեղ հանգիստ է անցկացրել է, թե՝ ո՞չ, պատասխանեց, որ ինքը եղել է Դավոսում. «Ես ունեցել եմ պաշտոնական հրավեր Դավոսի համաշխարհային տնտեսական ֆորումի կազմակերպիչներից՝ ուղեկցել իմ ամուսնուն ֆորումի շրջանակներում, բայց անձնական պատճառներից ելնելով, ֆորումում չեմ հայտնվել: Գնացել եմ, բայց ֆորումին չեմ մասնակցել, բայց ծախսերի մասով ավելորդ է անգամ խոսելը, չեմ ուզում անգամ արձագանքել»:
Ինչ վերաբերում է խոշոր հարկատուներին հանդիպելու հարցին, տիկին Հակոբյանը նշեց, որ հանդիպել է խոշոր հարկատուների հետ. «Այս հանդիպումները կլինեն պարբերական, հանդիպման նպատակը եղել է «Իմ Քայլը» հիմնադրամի ծրագրերը ներկայացնելը: Ես նաև ունեցել եմ կոնկրետ առաջարկներ, առաջարկել եմ ձևավորել Հայաստանի դասական երաժշտության բարեկամների խումբ, որպեսզի, ինչպես նշեցի, այդ գումարը կարողանանք ձևավորել»:
