Երբ ես երբեմն մտովի, երբեմն բարձրաձայն խոսում եմ տղայիս հետ, անգամ փորձ չեմ անում նրան նախատելու: Այսօր՝ փետրվարի 26-ին, Ազատության հրապարակում ակցիայի ժամանակ հայտարարեց ապրիլյան պատերազմի հերոս Անդրանիկ Զոհրաբյանի հայրը՝ Ատոմ Զոհրաբյանը:
«Ես նրան մի բան եմ ասում՝ տղաս, ես ընդունում եմ քո ընտրությունը, հարգում եմ քո ընտրությունը, խոնարհվում եմ քո ու քո ընկերների ընտրության առաջ: Ես որպես ծնող, որպես հայր խոստանում եմ մինչև իմ ապրելիք օրերի վերջը ես տեր եմ կանգնելու քո ընտրությանը»,-նշեց Զոհրաբյանը:
Անդրանիկի հոր խոսքերով, հողը, որը ներծծված է հայի արյամբ, երբեք չի կարող սակարկման առարկա լինել. «Այդ հարցը մեզ համար լուծված է: Այն լուծել է հայ ազատամարտիկը, ֆիդային, զինվորը, կամավորականը, լուծել են իրենց կյանքի գնով: Դրանք մեզ համար սրբազան հայրենիք են, իսկ մարդիկ իրենց սրբությունները երբեք չեն զիջում»:
