Հայաստանի ժուռնալիստների միության նախագահ Սաթիկ Սեյրանյանը կարծում է, որ լրատվամիջոցներին փորձելով իրենց զբաղեցրած տարածքներից հանել, իշխանությունները շարունակում են նույն քաղաքականությունը, ինչ սկսել են ամիսներ առաջ՝ իշխանափոխությունից հետո:
«Այս ամենն իշխանությունների վարած նույն տրամաբանության շրջանակներում է, ինչ մամուլի նկատմամբ տեղի է ունենում իշխանափոխությունից հետո մինչ օրս. հայտարարություններ, գրառումներ, հոխորտանքներ, մամուլի դեմ արշավ։ Սա ես դիտարկում եմ այդ քայլերից մեկը»,-ասաց Սեյրանյանը։
Նա նշեց, որ ո՛չ միայն Բուզանդի 1/3 հասցեում գտնվող լրատվամիջոցների, այլ նաև Իսահակյան 28 հասցեի և Մամուլի շենքում տեղակայված լրատվամիջոցներն էլ նման «սև» թուղթ ստացել։
«Շատ հետաքրքիր է նկատել, որ երեկ վարչապետի ընտանիքի անդամներից ևս մեկը մամուլին փորձեց դասեր տալ ու դեղին անվանել լրատվամիջոցներին, որոնք քննադատում են իրենց ընտանիքին։ Շատ զավեշտալի էր կարդալ»,-ասաց Սաթիկ Սեյրանյանը։
Աղբյուրը՝ Aysor.am
