Այսօր դեռ Վազգեն Սարգսյանի երազած Հայաստանը չէ, բայց կարծում եմ, որ մենք պետք է պայքարենք, աշխատենք, յուրաքանչյուրս մեր տեղում լինենք, որպեսզի կարողանանք ունենալ այն երազած Հայաստանը, որը երազում էր Վազգենը՝ հայ ժողովրդի համար: Այս մասին լրագրողների հետ զրույցում հայտարարեց Վազգեն Սարգսյանի եղբայրը՝ Արմեն Սարգսյանը:
Հարցին, թե կարելի է ասել արդյո՞ք, որ այսօր Հայաստանն այդ ճանապարհին է, Սարգսյանն ասաց, որ դեռ վաղ է այդ մասին խոսելու համար. «Ամեն դեպքում ներկա իշխանությունների մոտ կա ձգտում հասնել այն Հայաստանին, որի մասին երազում էր Վազգեն Սարգսյանը»:
Արմեն Սարգսյանը խոսեց նաև Վազգեն Սարգսյանի մասին որպես եղբոր. «Ես հպարտ եմ, որ այդպիսի ավագ եղբայր եմ ունեցել: Ես հպարտ եմ նաև Արամով: Վազգենն իդեալական եղբայր է եղել»:
Սարգսյանը նշեց, որ երեխա ժամանակ, ինչպես բոլոր եղբայրները, իրենք ևս կռվել են իրար հետ. «Իհարկե եղել են: Բայց արդեն մեծ տարիքում՝ 8-րդ դասարանից հետո, Վազգենը երբեք մեզ վրա ձեռք չի բարձրացրել, բայց պուճուր ժամանակ ինձ էլ, Արամին էլ գլխներիս կտացնելով անցել է»,-ժպիտով հիշեց Սպարապետի եղբայրը:
Սարգսյանը նշեց, որ Վազգենը միշտ տանը եղել է եղբայր, կռվի տարիներին իրենց գլխավոր գերագույն հրամանատարը, իսկ առհասարակ իրենք փորձել են իրենց հարցերով չծանրաբեռնել Սպարապետին՝ անձնականն ու պետության գործերը չխառնելով իրար:
