Հայաստանի նախագահ Սերժ Սարգսյանի Չեխիայի հանրապետություն այցի շրջանակներում . այսօր՝ հունվարի 31-ին տեղի կունենա հայ-չեխական գործարար համաժողով: Համաժողովի համակազմերպիչներն են Զարգացման հայկական գործակալությունը եւ Հայաստանի Արդյունաբերողների եւ Գործարարների (Գործատուների) Միությունը:
Գործարար համաժողովին ներկա կգտնվեն երկու երկրների նախագահներ Սերժ Սարգսյանը եւ պարոն Միլոշ Զեման:
Ելույթներով հանդես կգան Չեխիայի հանրապետության Արդյունաբերության եւ առեւտրի նախագահ պարոն Իրժի Չինչալը, ՀՀ էկոնոմիկայի նախարար պարոն Վահրամ Ավանեսյանը:
ԶՀԳ գլխավոր տնօրեն պարոն Ռոբերտ Հարությունյանը կներկայացնի շնորհանդես Հայաստանի ներդրումային միջավայրի վերաբերյալ, կանցկացվեն հանդիպումներ հայ եւ չեխ գործարարների միջեւ:
Համաժողովին Հայաստանից մասնակցում է արդյունաբերության տարբեր ոլորտներ ներկայացնող 22 ընկերություն՝ տուրիզմ, շինարարություն, բնական պաշարներ, գյուղատնտեսություն, արդյունաբերական քիմիա, ոսկերչություն, անվտանգության համակարգեր, դեղագործություն, հեռահաղորդակցություն, առեւտուր, հիդրոէլեկտրակայաններ:
Հայաստանի Հանրապետության եւ Չեխիայի Հանրապետության միջեւ արտաքին առեւտրաշրջանառությունը 2013 թվականի հունվար-դեկտեմբեր ամիսներին կազմել է 28.1 մլն ԱՄՆ դոլար` նախորդ տարվա նույն ժամանակաշրջանի համեմատ աճելով 28.8%-ով: Ընդ որում, արտահանումը ՀՀ-ից Չեխիայի Հանրապետություն կազմել է 8.4մլն ԱՄՆ դոլար:
Արտահանվել է հիմնականում ալյումին, ինչպես նաեւ սեւ մետաղներ: Ներմուծվել են հիմնականում միջուկային ռեակտորներ, կաթսաներ, սարքավորումներ եւ մեխանիկական մասեր, էլեկտրական մեքենաներ եւ սարքավորումներ, ձայնագրող ապարատներ, իրեր սեւ մետաղներից, ապակի, վերգետնյա տրանսպորտային միջոցներ:
Ներկայումս Հայաստանում գործում են չեխական կապիտալով ավելի քան 20 ընկերություն:
