Մենք չենք քանդում, վերականգնում ենք, քանդելու ժամանակներն արդեն անցել են, կգաք կտեսնեք, թե ինչ սիրուն է լինելու: Օպերայի հարակից տարածքում ապամոնտաժման ենթակա սրճարաններից մեկի աշխատակից հետ բանավեճի ժամանակ հայտարարեց Կենտրոն վարչական շրջանի ղեկավար Վիկտոր Մնացականյանը:
Դիտարկմանը, որ վաղը կարող է գան նոր իշխանություններ և այլ բան որոշեն, Մնացականյանը նշեց. «Քանի մենք ենք ղեկավարում, քանի դեռ 81 տոկոս ունենք. Մի հատ ասա 81 տոկոս, բրատ, 81 տոկոսը մեզ վստահել է սրա համար»:
Մնացականյանը նշեց, որ ստորագրված պայմանագրում կետ կա, որի համաձայն, քաղաքապետարանն իրավունք ունի մեկ ամիս առաջ ծանուցել, որ տարածքը պետք է ազատել, որից հետո մյուս կողմը պարտավոր է դա անել․ «Բրատ, աղջիկներին բերում կանգնեցնում եք տրակտորների առաջ: Ջահել աղջիկներին բերել եք դրել եք տրակտորների դեմը, դա քեզ չի սազում, Էրիկ ջան»,-հայտարարեց Կենտրոնի թաղապետը, դիմելով մի քաղաքացու, ում հետ, իր խոսքերով պայմանավորվածություն է ունեցել, որ գույքը պետք է հանեն, որից հետո ապամոնտաժումը պետք է շարունակվի:
Էրիկը ներկայացնում է Ջազզվե սրճարանը, նա նշեց, որ նման պայմանավորվածություն չկա, ինքն ուղղակի ասել է, որ գույքն է ուզում հանել, բայց չի ասել, որ իրենք իրենց ձեռքով կքանդեն:
