Իսպանիայի առաջնութան շրջանակներում կատալոնական «Բարսելոնան» հերթական հաղթանակը տոնեց՝ հյուրընկալվելիս 1:4 հաշվով պարտության մատնելով «Բետիսին»: Կատալոնական գրանդի կազմում երեք գոլի հեղինակ դարձավ Լեոնել Մեսսին, մեկ գոլ իր հաշվին գրանցեց երեկոն տապալած Լուիս Սուարեսը, ով, մի շարք 100 տոկոսանոց գոլային պահեր չիրացնելուց զատ, նաև վնասվածք ստացավ:
Հանդիպմանը նաև բացառիկ երևույթ տեղի ունեցավ: Արգենտինացու երրորդ գոլից հետո տանտերերի երկրպագուները ոտքի կանգնեցին և սկսեցին ծափահարել վերջինիս: Ավելի ուշ Մեսսին շնորհակալություն հայտնեց երկրպագուներից:
«Չեմ հիշում՝ ծափահարել են արդյոք ինձ այլ մարզադաշտերում: Շնորհակալ եմ նրանց նման արձագանքի համար: Նրանք միշտ շատ լավ են վերաբերվում մեզ և ուրախանում են մեր հաղթանակի համար: Շատ շնորհակալ եմ, որ նրանք այդպես արձագանքեցին իմ երրորդ գոլին»,-ասել է Մեսսին՝ հավելելով, որ շատ կարևոր հաղթանակ գրանցեցին իրենց հաշվին:
Այս հաղթանակը հարազատ ակումբի կազմում Մեսսիի 477-րդ հաղթանակն էր: Այսպիով, նա հերթական ռեկորդը գրանցեց իր հաշվին՝ առաջ անցնելով իր ավագ խաղընկերոջից՝ Խավիից: Հիմա Մեսսին առաջին հորիզոնականում է նաև այս ցուցանիշով: