ԱԺ «Հայ ազգային կոնգրես» խմբակցության պատգամավոր Նիկոլ Փաշինյանը այսօր՝ «Պետական պաշտոններ զբաղեցնող անձանց աշխատավարձերի մասին» ՀՀ օրենքի քննարկման ժամանակ սոցապ նախարարին հարցրեց, թե ինչու է Կառավարությունը ցանկանում նման որոշում ընդունել և հայտարարեց, թե ՍԴ անդամները՝ նախագահ Գագիկ Հարությունյանի գլխավորությամբ ,ոչ միայն բարձր թոշակ, այլև նույնիսկ աշխատավարձ ստանալու իրավունք չունեն։
«ՍԴ անդամների համար այս օրենքով ապահով ծերություն է ապահովվում, ինչը, ճիշտն ասած, այնքան էլ, ինչպես կասեր ՀՀԿ ղեկավարը, սիրուն չի»,- նշեց Նիկոլ Փաշինյանը և ապա շարունակեց, թե պարզ է, թե ինչու համար են շահագրգռված բարձրացնել ՍԴ անդամների թոշակը. ՍԴ-ը իշխանության ու կառավարության հետ «նույն խաղի մեջ է»։
Հիշեցնենք, որ ՀՀ Նախագահ Սերժ Սարգսյանի առարկությամբ այդ օրենքը, որով անհրաժեշտ է կրկին անգամ քննարկել ՍԴ անդամների կենսաթոշակի հարցը և բարձրացնել մինչև 450 հազար դրամ, ԱԺ էր վերադարձվել։
Նիկոլ Փաշինյանն անդրադարձավ մամուլի հրապարակմանը, ըստ որոնց՝ Գագիկ Հարությունյան եղբայր Արզուման Հարությունյանը կարող է նշանակվել ԱԼԱԾ պետի առաջին տեղակալ։ «Եվ ես հույս ունեմ, որ Գագիկ Հարությունյանն ու իր ընտանիքը երբևէ ընդդիմությանը շնորհակալություն կհայտնեն իրենց ընտանիքի բարեհաջող կարիերայի ու ապահով ծերության համար»,– ասաց նա:
Արտեմ Ասատրյանը պատասխանում նշեց, որ համամիտ չէ այդ տեսակետի հետ և որ բոլոր փոփոխություններն իրավական համապատասխան ուժ ունեն:
Նիկոլ Փաշինյանն արձագանքելով նախարարին՝ պնդեց, թե ՀՀ-ում, որտեղ միլիոնից ավել մարդ գտնվում է աղքատության գծից ցածր, ինչու պիտի ՍԴ անդամը այդքան կենսաթոշակ ստանա: «Այն էլ այն ՍԴ անդամը, որ պատասխանատու է ՀՀ-ում ստեղծված այս իրավիճակի համար, ի՞նչի պիտի 450 հազար կենսաթոշակ ստանա: ՍԴ անդամները իրենց նախագահ Գագիկ Հարությունյանի գլխավորությամբ նույնիսկ աշխատավարձ ստանալու իրավունք չունեն, ինչ մնաց այդքան թոշակ»,-եզրափակեց Նիկոլ Փաշինյանը:
