Վրաստանի պաշտպանության նախկին նախարար Դավիթ Քեզերաշվիլին այսօր ֆրանսիական Էքս ան Պրովանս քաղաքի դատարանի որոշմամբ ազատվել է՝ էլեկտրոնային ապարանջան կրելու պայմանով:
Այս մասին ասված է Վրաստանի դատախազության հաղորդագրությունում:
Դավիթ Քեզերաշվիլիին արգելել են լքել Ֆրանսիայի տարածքը եւ պարտավորեցրել բնակվել դատարանի նշած հասցեում: Նա բնակարանը կարող է լքել որոշակի ժամերի:
էլեկտրոնային ապարանջան կրելու ժամկետը 6 ամիս է: Նաեւ՝ դատարանի որոշմամբ նա պետք է դատարանին հանձնի իր երկու անձնագրերը:
«Վրաստանի գլխավոր դատախազությունը շարունակում է արտահանձնման հարցով ֆրանսիացի գործընկերների հետ բանակցությունները», - ասված է գերատեսչության հաղորդագրությունում:
Հիշեցնենք, իշխանությունների կողմից հետախուզվող Վրաստանի պաշտպանության նախկին նախարար 35-ամյա Դավիթ Քեզերաշվիլին 2013թ. հոկտեմբերին ձերբակալվել էր Ֆրանսիայում: Նա մեղադրվում է բազմամիլիոնանոց կաշառքներ վերցնելու եւ զենքի ապօրինի առեւտրի համար:
