Եթե Սերժ Սարգսյանը թավշյա ձևով գնաց, նույնիսկ մնաց Հայաստանում, Նիկոլ Փաշինյանը, ես համոզված եմ, չի մնալու Հայաստանում ու այդ օրը շատ մոտ է: Այսօր՝ մարտի 21-ին, լրագրողների հետ հանդիպմանը հայտարարեց «Ազգային համաձայնություն» կուսակցության նախագահ Արամ Հարությունյանը:
Հարությունյանն ամեն դեպքում վստահ է, որ Փաշինյանին գտնելու են բերեն ու նա պատասխան կտա ամեն ինչի համար:
Բանախոսը Նիկոլ Փաշինյանին քննադատեց վերջին մամուլի ասուլիսի համար՝ նշելով, որ դրանով վերջինս ժամանակ է շահում՝ դա անելով ամեն ինչ կենցաղային մակարդակի իջեցնելով. «Ի վերջո է ո՞վ է իմացել, թե ով է քնել Ստալինի ծոցը»:
Ինչ վերաբերում է Մարտի 1-ի գործին, Արամ Հարությունյանի խոսքերով, այսօր մարտի են եղել արյունոտ ցուցակի աբիժնիկները՝ Գագիկ Ջհանգիրյանը, Վահան Շիրխանյանը և Անդրանիկ Քոչարյանը. «Ընդ որում պատահական չէ, որ Քոչարյանին պարտադրած ցուցակը կարմիր գույնի էր, կարծես թե գրված էր Վազգեն Սարգսյանի արյունով: Այդ մարդիկ Նաիրի Հունանյանից ոչնչով չեն տարբերվում: Եթե Նաիրին գոնե հրապարակային վեր էր կացել ու նման բան արել, այս աբիժնիկները տակից են գործում: Ջհանգիրյանն ընտրակեղծարարների Ջեֆերսոնն է, նա կեղծիքների կնքահայրն է: Էլ չեմ ասում Անդրանիկ Քոչարյանի մասին, ով Գյումրիից հազիվ փախավ: Իսկ Շիրխանյանի մասին բոլորը գիտեն, թե ինչ էր: Այդ մարդիկ այսօր խոսում են: Այսօր մարտի 1-ի գործի ապացուցողական բազան փոխվելու է, ես համոզված եմ: Նիկոլ Փաշինյանի պատվերով ստեղծված ՀՔԾ-ն միանգամից շեղել է ամբողջ նախաքննությունը»: