Այսօր լրացավ Անդրանիկ Մարգարյանի մահվան 12-րդ տարելիցը: Կոմիտասի անվան Պանթեոնում իրենց հարգանքի տուրքը մատուցեցին նաև ՀՀԿ քաղաքական գործիչները՝ ՀՀ երրորդ նախագահ և կուսակցության ղեկավար Սերժ Սարգսյանի գլխավորությամբ:
Հանրապետական կուսակցության երիտասարդական կազմակերպության նախագահ Հայկ Մամիջանյանը, Analitik.am-ի հարցերին պատասխանելով, խոսեց Հանրապեպետական կուսակցության՝ քաղաքականություն վերադառնալու մասին՝ հայտարարելով, որ դրա համար որևէ խնդիր չկա. «Նույնիսկ Նիկոլ Փաշինյանի վարչախմբի կազմակերպած ընտրություններում ՀՀԿ-ն չորրորդ քաղաքական ուժն է: Հիշեցնեմ, որ ժամանակին չորրորդ քաղաքական ուժը «Ելք» դաշինքն էր, այն էլ՝ ոչ թե միայնակ, այլ՝ երեք կուսակցություններով»,-նշեց Մամիջանյանը:
Նա նաև վստահեցրեց, որ ՀՀԿ որևէ վայրկյան դուրս չի մնացել ներքաղաքական գործընթացներից և այս պահին նույնպես շարունակում է մնալ ակտիվ ներքաղաքական գործընթացների մեջ:
Իսկ քաղաքական ներկայիս վիճակը գնահատելիս Հանրապետական երիտասարդական թևի ղեկավարը նշեց, որ կան բազմաթիվ խնդրահարույց կետեր, որտեղ անհրաժեշտ է աշխատել. «Մենք մտադիր ենք առողջ քննադատի տրամաբանությամբ ցույց տալ ընթացիկ կառավարության սխալները: Վստահեցնում եմ, որ ունենք բոլոր թե՛ մարդկային, թե՛ ուղեղային ռեսուրսները մեր ձայնը լսելի դարձնելու համար»:
Մեզ հետ զրույցում ԱԺ նախկին փոխխոսնակ Էդուարդ Շարմազանովը չցանկացավ խոսել քաղաքականության մասին՝ հայտարարելով, որ պատրաստ է պատասխանել մեր հարցերին, բայց ոչ այսօր և ոչ Պանթեոնում. «Այսօր հիշատակի օր է: Չեմ կարծում, որ պետք է քաղաքական գնահատականներ տալ»: