ԱԺ ամբիոնից «Հայ ազգային կոնգրես» խմբակցության պատգամավոր Հրանտ Բագրատյանն այսօր դիմելով ԱԺ մեծամասնությանը՝ հայտարարեց, թե «գազային պայմանագրերի» հարցով ժամանակավոր հանձնաժողովի ստեղծման վերաբերյալ ոչ իշխանական ուժերի առաջարկը տեղին էր, որից չօգտվեց իշխանությունը:
«Մեր առաջարկը ճիշտ տեղին էր, մեծամասնությունը պետք է ընդուներ այն, քանի որ դա ձեզ համար արգումենտ էր դառնալու, որ գնայիք բանակցության ու ասեիք՝ սա կա: Շատ վատ արեցիք, որ չթողեցիք կայանար հանձնաժողովը»,- ասաց նա։
Հրանտ Բագրատյանի հայտարարությունից հետո արձագանքեց ԱԺ նախագահ Հովիկ Աբրահամյանը, ով համաձայնեց ՀԱԿ պատգամավորի դիտարկման հետ։
«Համաձայն եմ, որ պիտի քննարկենք բոլոր հարցերը և մենք առաջիկայում ստեղծելու ենք հնարավորություն, որ դուք նախաձեռնել էիք այդ հանձնաժողովը ստեղծելու համար՝ ժամանակավոր, ստեղծելու ենք և բոլոր հարցերը քննարկելու ենք, անպայման, ու ես պիտի խնդրեմ, որ բոլոր քաղաքական ուժերը ակտիվ մասնակցություն ունենան»,-նշեց նա:
