Հունաստանի վարչապետ Անտոնիս Սամարասը հայտարարել է, որ երկիրը դուրս է գալիս պարտքային ճգնաժամից, փոխանցում է գերմանական Bild-ը:
Հրատարակությանը տված հարցազրույցում Սամարասը հայտնել է, որ 6 տարվա անկումից հետո Հունաստանի տնտեսությունը վերականգնվում է: Նա վստահություն է հայտնել, որ իր երկիրը կհաղթահարի պարտքերի հետևանքով առաջացած ճգնաժամը:
Հույն պաշտոնյան նկատել է, որ ոչ ոք այլևս չի խոսում եվրոգոտուց Հունաստանի դուրս գալու մասին:
Վերջին մի քանի տարում Հունաստանի արտահանումը գերազանցել է ներմուծումը:
Եվրոգոտու երկրների ֆինանսների նախարարները 2012-ից 130 մլրդ եվրոյի վարկ են տրամադրում Հունաստանին` մինչև 2015-ը ճգնաժամը հաղթահարելու համար:
